Elorda turǵynyn tonaýshy pyshaqtap ketti
Nur-Sultan qalasy polıtsııa departamentiniń habarlaýynsha, reıdtik is-sharalar kezinde elordalyq polıtsııa qyzmetkerleri jol qozǵalysy erejelerin, óreskel zań buzý faktilerin anyqtap, jolyn kesken.
«7 kúndik sharanyń aıasynda izin sýytpaı 135 qylmys, buryn jasalǵan 93 qylmys ashyldy, izdeýde júrgen 26 adam ustaldy. Polıtsııa qyzmetkerleri qaraqshylyq shabýyl jasady degen kúdikpen 45 jastaǵy qala turǵynyn ustady», - dep jazylǵan departamenttiń dereginde.
Oqıǵa 25 tamyz kúni saǵat 03.36-da bolǵan. Kúdikti Janarys kóshesindegi beıtanys úıge kirip, ıesin pyshaqtap, eki uıaly telefon men aqshany qoldy qylǵan. Polıtsııa qyzmetkerleri kúdiktini ustady. Ol qylmys jasaǵanyn moıyndaǵan, ýaqytsha ustaý ızolıatorynda otyr.
«Atalǵan fakti boıynsha qylmystyq is qozǵalyp, tergeý amaldary júrgizilip jatyr. Jábirlenýshi aýrýhanada, ómirine qaýip tónip turǵan joq. «Quqyqtyq tártip» jedel aldyn alý is-sharasy barysynda zańsyz aınalymnan 8 qarý-jaraq alyndy. 25 tamyzda jedel-profılaktıkalyq is-shara barysynda elordanyń 26 jastaǵy turǵynynan tintý kezinde tapansha tárkilendi. Atalǵan fakti boıynsha qylmystyq is qozǵaldy. Ustalǵan azamat ýaqytsha ustaý ızolıatoryna qamaldy.
Budan basqa, operatsııa barysynda 8 myńnan astam ákimshilik quqyq buzýshylyq anyqtaldy. Onyń ishinde 675 usaq buzaqylyq faktisi, 1218 spırt ishimdikterin ishý nemese qoǵamdyq oryndarǵa masań kúıde kelý faktisi, 2735 adam tirkeýsiz nemese jeke basyn kýálandyratyn qujattarsyz turý faktileri boıynsha jaýapqa tartyldy», - deıdi Nur-Sultan qalasy polıtsııa departamentiniń jergilikti polıtsııa qyzmetiniń bastyǵy Arman Aıtmaǵambetov.
Departamenttiń baspasóz qyzmeti taratqan málimet boıynsha, shara ótken 7 kúninde 28 júrgizýshi mas bola turyp kólikti aıdaǵany úshin ákimshilik jaýapkershilikke tartylǵan. Sondaı-aq, esirtki zattaryn saqtaýdyń 44 faktisin anyqtalǵan.