Elorda turǵynyn áleýmettik jelide tanysqan jigit tonap ketti

NUR-SULTAN. QazAqparat – Nur-Sultan qalasynyń turǵynyn kezdesýden keıin tanys adamy tonap ketti. Tergeý nátıjesinde 27 jasar jigittiń 28 jasar qyzben áleýmettik jeli arqyly tanysqany anyqtaldy, dep habarlaıdy QazAqparat Nur-Sultan qalasy polıtsııa departamentine silteme jasap.

Jup bir aı boıy jelide sóılesken. Nátıjesinde olar kezdeýge sheshim qabyldap, jigit jańa tanysyn qonaq úıge shaqyrady. Birge otyryp, tamaqtanǵannan keıin qyz uıyqtar aldynda altyn buıymdaryn sheship qoıǵan. Jigit ony paıdalanyp, 100 myń teńgege baǵalanǵan zergerlik buıymdardy alyp, saǵat tańǵa tórtke taman qonaq úıden shyǵyp ketken.

Krımınaldyq polıtsııa qyzmetkerleri jedel-izdestirý sharalary barysynda kúdiktini ustaǵan, ol buryn birneshe ret sottalǵan bolyp shyqty. Er adam óz qylmysyn moıyndady, onyń Nur-Sultan aýmaǵyndaǵy uqsas qylmystarǵa qatysy bar nemese joq ekeni anyqtalýda. Atalǵan fakti boıynsha qylmystyq is qozǵaldy.

Nur-Sultan qalasy polıtsııa departamenti azamattardy abaı bolýǵa shaqyrady, jaqyn tanys emes adamdarǵa senbeýge jáne baǵaly zattardy qaraýsyz qaldyrmaýǵa keńes beredi.