Elorda turǵyny jalǵa alǵan kólikti satyp jibergen

NUR-SULTAN. QazAqparat – Elordanyń polıtsııa bólimine 32 jastaǵy jergilikti turǵyndardyń biri kelip, belgisiz bireýdiń aqshasyn aldap alǵanyn aıtyp, shaǵymdandy, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Tergeý barysynda jábirlenýshi avtokólikterdi satý saıtynan «Toıota Kamrı 70» markaly kóliktiń 12 mln teńgege satylyp jatqany týraly jarnamany kórgeni anyqtaldy. Satýshysy kóligin shuǵyl aqsha qajet bolǵan soń arzan baǵaǵa satyp jatqanyn aıtqan. Kólikti qarap shyqqan jábirlenýshi ony 11 mln 700 myń teńgege satyp almaq bolyp, kelisip, sol mezette 11 mln teńgesin beredi. Al kúdikti kóliktiń kiltin tabystap, mashınany qalǵan somany bergen soń qaıta rásimdeýge ýáde etken.

Tergeý kezinde alaıaqtyń atalǵan kólikti jalǵa alyp, keıin satylatyny týraly habarlandyrý bergeni anyqtalǵan.

Elorda polıtseıleri jedel-izdeý sharalary barysynda buryn sottalǵan 36 jastaǵy er adamdy Almaty qalasynan ustady. Ol ýaqytsha ustaý abaqtysyna qamaldy. QR Qylmystyq kodeksiniń 190-baby boıynsha sot aldyndaǵy tergeý amaldary júrgizilýde. Qazirgi kezde polıtseıler kúdiktiniń áreketin zardap shekken adamdardy anyqtaý ústinde.

Nur-Sultan qalasynyń Polıtsııa departamenti azamattardy kólik satyp alý kezinde qujattarǵa muqııat bolý qajettigin eskertedi.