Elorda turǵyny urlandy degen sómkesin, azyq-túlik arbasynda umytyp ketken
NUR-SULTAN. QazAqparat - Polıtsııa qyzmetkerleri elorda turǵynyna saýda ortalyqtarynyń birinde joǵaltqan qundy zattaryn taýyp berdi, dep habarlaıdy QazAqparat tilshisi.
«Búgin Nur-Sultan qalasynyń Polıtsııa departamentine elorda turǵyny kóliginen aqsha, «Vertu» markaly uıaly telefony jáne qujattar salynǵan shaǵyn qol sómkesi urlanǵanyn aıtyp, aryzdanǵan. Polıtsııa qyzmetkerleri júrgizgen jedel izdestirý sharalary barysynda urlyq faktisi dáleldengen joq», - dep atap ótedi Polıtsııa departamentinen.
Vedomstvo aqparatyna qaraǵanda, polıtsııa qyzmetkerleri mán-jaıdy anyqtaý úshin Dostyq kóshesinde ornalasqan «Kerýen» saýda, oıyn-saýyq ortalyǵyn nysanaǵa alǵan. Atalǵan ortalyqtyń kólik turaǵynda ornatylǵan vıdeobaqylaý kameralaryn qaraý barysynda zardap shegýshi azamattyń shaǵyn qol sómkesin azyq-túlikke arnalǵan arbada qaldyryp ketkendigi anyqtalǵan. Sómkeni ortalyq qyzmetkeri taýyp alyp, bul jaıynda basshylyqqa habar bergen.
«Elorda turǵyny polıtsııaǵa jáne «Kerýen» SOSO qaýipsizdik qyzmetiniń qyzmetkerlerine múlkin qaıtaryp bergeni úshin rızashylyǵyn bildirdi», - deıdi vedomstvodan.
