Elorda turǵyny tikeleı efırde sýıtsıd jasamaq boldy
NUR-SULTAN. QazAqparat - Elordanyń polıtsııa qyzmetkerleri áleýmettik jeliniń tikeleı efırinde sýıtsıd jasamaq bolǵan azamattyń ómirin aman alyp qaldy, dep habarlaıdy QazAqparat tilshisi.
Nur-Sultan qalalyq polıtsııa departamentiniń málimetinshe, 25 qazan kúni shamamen 22:00-de Facebook áleýmettik jelisin qoldanýshylardyń biri belgisiz er adamnyń tikeleı efırde kópirden sekireıin dep turǵanyn habarlaıdy.
Osydan keıin tez arada jumysqa kirisken beınebaqylaý operatorlar sýıtsıd jasamaq bolǵan adamnyń Saraıshyq kópirinde turǵanyn anyqtap, oqıǵa ornyna patrýldik polıtsııa ekıpajyn jiberedi.
«Polıtsııa qyzmetkerleri kúızelisti jaǵdaıda ári kópir taıanyshynan tómen qaraı sekirýge daıyn turǵan azamatty tapty. Polıtsııa qyzmetkerlerimen sóılesý barysynda ol taǵdyryna nalyp, áıelimen ajyrasqanyn, balalaryn saǵynǵanyn aıtyp muńyn shaqty. Qyzmetker azamatpen sóılesýin jalǵastyra otyryp, ony sekirmeýge kóndirýge tyrysty. Polıtsııa qyzmetkeri oǵanjaqyn kelgen sátte qapsyra qushaqtap alyp, qaýipsiz jerge alyp shyqty. Ómirmen qosh aıtyspaq bolǵan 34 jastaǵy elorda turǵyny mán-jaıdy anyqtaý úshin Esil aýdandyq polıtsııa basqarmasyna jetkizildi», - dep atap ótedi departamentten.
Azamattyń psıhoemotsııalyq jaǵdaıyn turaqtandyrý úshin psıhologtar jumys istedi. Kúızelis kezinde kásibı psıhologııalyq kómek kórsetilgen.
