Elorda turǵyny ózi júze almasa da, sýǵa qulap ketken balany qutqardy
ASTANA. QazAqparat – Elordada 11 jasar bala mysyqqa baramyn dep, ózenge qulap ketken. Sol mańda serýendep júrgen qala turǵyny dereý kómekke umtylyp, ony qutqaryp qaldy, dep habarlaıdy QazAqparat Polisia.kz saıtyna silteme jasap.
Elena Shelestıýk «Alataý» sport kesheniniń mańynda serýendep júrip, ózennen ashyq qyzyl tústi bas kıimdi baıqaıdy. Muqııat qaraǵanynda ıyǵyna deıin sýǵa batyp, jantalasyp jatqan balany kóredi de, tez júgirip barady.
«
Ókinishke qaraı, men júze almaımyn, biraq qazir seni alyp shyǵamyz dep, balany barynsha jigerlendirýge tyrystym. Oǵan muzdy sýdan shyǵýǵa kómektesý úshin jolǵa júgirip, kólikterdi toqtata bastadym. Júrgizýshilermen birge balany ózennen shyǵaryp aldyq. Bul ońaı bolǵan joq. Balanyń kıimi sý, rıýkzagy da ábden sýǵa tolyp, ony tómen qaraı tartqan. Onyń ústine, qatty qoryqqan bala óz betinshe kúrese almaǵan
», - deıdi ol.
Qutqarylǵan búldirshin dereý aýrýhanaǵa jetkizilip, qajetti medıtsınalyq kómek kórsetildi.
Anyqtalǵanyndaı, bala jattyǵýdan shyqqannan keıin Aqbulaq ózeniniń boıymen úıine bara jatyp, muzda otyrǵan mysyqty kóredi. Tómen túsip, oǵan barmaq bolady. Alaıda, juqa muz bala basqan bette birden jarylyp ketedi.
Balanyń anasy men polıtsııa qyzmetkerleri batyl áıelge alǵys bildirdi.
Foto: polisia.kz
