Elorda turǵyny mobıldi qosymsha arqyly dosynyń 900 myń teńgesin urlaǵan
«Polıtsııaǵa iri somadaǵy aqshanyń urlanýy faktisi boıynsha elorda turǵyny habarlasty. Onyń sózine qaraǵanda, Kaspi bankiniń mobıldi qosymshasyndaǵy shotynan 900 myń teńge joǵalǵan. Aqshanyń urlanýyna baılanysty ol vırtýaldy alaıaqtarǵa kúdik túsip turǵanyn aıtqan. Tergeý amaldary kezinde qarajat joǵalardyń aldynda jábirlenýshi kóshede dosyn kezdestirgeni, áńgime barysynda telefon shalý úshin dosy onyń smartfonyn suraǵany anyqtaldy», - delingen Polıtsııa departamenti málimetinde.
Belgili bolǵandaı, kúdikti dosynyń telefonyn alyp, mobıldi qosymsha arqyly 900 myń teńgeni óziniń zaıybynyń telefonyna aýdaryp jibergen. Keıin dosyna smartfonyn qaıtaryp bergen.
Kúdikti atalǵan somadaǵy qarajat dosynda bar ekenin budan buryn bilip, múmkindikti paıdalanyp, aqshany jymqyrǵan.
«21 jastaǵy kúdikti istegen áreketin moıyndady. Fakti boıynsha qylmystyq is qozǵaldy», - delingen habarlamada.