Elorda turǵyny mektepten bala urlaý kúdigine ilikti
ASTANA. QazAqparat - Astana qalasynyń Bilim basqarmasy balasyn mektepten bóten er adam alyp ketpek bolǵandyǵyn aıtqan áıeldiń áleýmettik jelidegi jazbasyna túsinik berdi, dep habarlaıdy QazAqparat tilshisi.
Oqıǵa elordadaǵy №79 mektepte bolǵan.
«Qaıryly kesh, ata-analar! Barlyqtaryńyzdy eskertkim keledi. Búgin keshkisin mekteptiń janynda qorqynyshty jaıt oryn aldy. Mekteptiń qaqpasyna qarama-qarsy jerde kólik ishinde kishkentaı balammen qyzymdy kútip otyrǵanmyn. Balamnyń mektepten shamamen 40 jastaǵy aıaǵyn syltyp basqan adammen birge shyqqanyn, onymen birdeńe jaıly sóılesip kele jatqanyn baıqadym. Qyzym kóligimdi kórmeı, onymen birge quryls alańyna qaraı bet aldy. Kólikten atyp shyǵyp, aıǵaı saldym. Ol qorqyp, qashyp ketti. Qaı baǵytqa ketkenin de baıqamadym. Qyzyma jetip barsam, ol gıpnozǵa túskendeı, eshteńe aıta almaı, kózderin ǵana jypylyqtatty. Úıde únemi beıtanys adamdarmen sóılespeý kerektigin, qalaı aldasa da onymen ermeý kerektigin ylǵy aıtyp otyramyn. Mektepke shyǵar aldynda habarlasyp, atalǵan jerde kútetinimdi de aıtqanmyn. Abaı bolyńyzdarshy. Mundaı adamdardan balalarymyzdy Alla saqtasyn», - dep jazdy «Whats App» messendjerine oqýshynyń anasy.
Ol sondaı-aq er adamnyń beınesi kórsetilgen vıdeony da taratqan. Vıdeojazba mekteptiń kúzet qyzmetinen alynǵan.
Keıinnen anyqtalǵandaı, atalǵan er adamdy kórshisi qyzyn mektepten alyp ketýge ótingen. Ol kelisken. Biraq, mektepke kelgende ony basqa oqýshymen shatastyrǵan. Osy jaıtqa oraı Astana qalalyq Bilim basqarmasy túsinik berdi.
«Vıdeodaǵy erkek - kórshisiniń ótinishimen óziniń balasyna qosyp kórshisiniń de qyzyn ala ketpek bolǵan ata-ana. Onyń atyn atap, keıin esiktiń aldynda kútip turǵan. Sol kezde mektepten basqa qyz shyǵyp, ony kórshisiniń qyzy dep oılaǵan. Alaıda, qyz anasynyń kóligine qaraı bettegende ol da sońynan ergen. Sol jerde onyń basqa bala ekendigin ata-anasynan bilgen», - dedi basqarmadan.
Vedomstvonyń atap ótýinshe, vıdeo avtory - oqýshy qyzdyń anasy mektep ákimshiligi tarapynan jaýapty kútpesten ony ortaq chatqa salyp jibergen.
«Mektep basshylyǵyna eskertý jasaldy. Óıtkeni, 1-synyptardyń synyp jetekshileri balalardy mundaı tosyn jaıttar oryn almaýy úshin tikeleı ata-analaryna/zańdy ókilderine ǵana tabystaýy tıis. Sonymen birge balalar arasynda qaýipsizdik erejesi boıynsha nusqaýlyq júrgizý tapsyryldy», - dep atap ótti Bilim basqarmasynan.
Aıta keteıik, kóp uzamaı «Whats App» messendjerinde balanyń anasynyń jáne bala urlaý kúdigine ilige jazdaǵan azamattyń fotosy tarady. Sýret astynda qatty qoryqqan erkektiń mektepke ózi kelgendigi jáne barlyǵy odan keshirim suraǵany jazylǵan. Sonymen qatar atalǵan azamattyń buǵan deıin ınsýlt alǵandyǵy, bul joly da júrek ustamasy qaıtalana jazdaǵany aıtylǵan.
