Elorda turǵyny lıft aqaýynan jazym bola jazdady
NUR-SULTAN. QazAqparat – Elordadaǵy Highvill turǵyn úı kesheniniń lıftinde er adam toqqa túsip jazym bola jazdaǵan, dep habarlaıdy QazAqparat tilshisi.
«Astana – Chto? Gde? Kogda?» Telegram-kanalynyń jazýynsha, kýrer jigit Highvill turǵyn úı kesheniniń turǵynyna tapsyrys boıynsha gúl aparyp, tómen túsý úshin lıftke kiredi. Shyǵar sátte lıftegi eki adam batyrmany qatar basqan. Osy kezde kýrer qasyndaǵy adamdy toq soǵyp, denesi bir sát jansyz qalǵanyna kýá bolǵan. Jigit onyń qolyn toq soqqan batyrmadan qorappen ulǵylap júrip ajyratady.
«Abyroı bolǵanda ol meni toqtan ajyratyp úlgerdi. Al men dármensiz kúıde qınalyp jattym. Artynsha esten tanyp aýrýhanaǵa túsippin. Toq keri serpigen kezde sátsiz qulasam kerek, qos ıyǵym shyǵyp, eki jaýyrynym synyp ketipti», – dep eske alady zardap shegýshi.
Ol lıfttegi aqaýǵa jaýapty adamdarǵa shara qoldanýdy talap etip otyr.
Akademık Batpenov atyndaǵy ortopedııa jáne travmatologııa ǵylymı-zertteý ınstıtýtynyń baspasóz qyzmeti lıftte toqqa túsken naýqastyń jaǵdaıy týraly málimet berdi. Ony Dosbol Ǵalym esimdi dáriger emdegen eken.
«Naýqas bizdiń ortalyqqa 7 tamyz kúni turaqty jaǵdaımen tústi. Eki ıyǵy shyǵyp ketken edi. Emdik jáne dári-dármektik protsedýralar túgel jasaldy. 4 kún dárigerlerdiń baqylaýynda boldy. Keshe úıge shyǵaryldy», - dep málimet berdi medıtsınalyq uıymnyń baspasóz qyzmeti.
Nur-Sultan qalasynyń polıtsııa departamenti osy oqıǵa boıynsha tergeý bastaǵan kórinedi.
«Atalǵan fakti boıynsha Qylmystyq kodekstiń 306-baby 1-bóligi (qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetterdi kórsetý) boıynsha sotqa deıingi tergeý júrip jatyr. Oqıǵanyń mán-jaıyn túgel anyqtaý úshin qajetti tergeý áreketteri bastaldy», - dep jazdy vedomstvonyń baspasóz qyzmeti.
Osy tergeý aıasynda sot-medıtsınalyq saraptama taǵaıyndalyp otyr. Sonyń qorytyndysy boıynsha protsessýaldyq sheshim qabyldanady.
