Elorda turǵyny «Kamazymen» polıtsııadan qashyp, qala shetinde ustaldy
NUR-SULTAN. QazAqparat – Elorda turǵyny «KamAZ» júk kóligimen polıtsııadan qashyp, qala shetinde ustaldy. Polıtsııanyń zańdy talabyna baǵynbaǵan ol Ákimshilik kodekstiń tórt babymen jaýapkershilikke tartyldy, dep habarlaıdy QazAqparat tilshisi qalalyq polıtsııa departamentiniń baspasóz qyzmetine silteme jasap.
Aıta ketsek Instagram-daǵy pablıktiń birinde buǵan deıin «KamAZ» júk kóligin qýalap bara jatqan polıtsııa kólikteriniń vıdeosy jarııalanǵan edi. Polıtsııa departamentiniń habarlaýynsha, oqıǵa búgin, ıaǵnı 19 qarashada tirkelgen.
«Saǵat 14.20-da Aınakól kóshesinde polıtsııa qyzmetkerleri qozǵalys barysyndaǵy «Kamaz» júrgizýshisiniń telefonmen sóılesip bara jatqanyn baıqap qalǵan. Polıtsııa qyzmetkerleri ony toqtatyp alyp, júrgizýshi kýáligin talap etken. Alaıda júrgizýshi talapty elemeı, kóligin júrgizip kete bergen», - dep habarlaıdy departamenttiń baspasóz qyzmeti.
Tártip saqshylary kólikpen «KamAZ» júrgizýshisin qaladan shyqqansha qýalaǵan. Aqyry júrgizýshi ustalyp, aýdandyq polıtsııa bólimine jetkizilgen. Júrgizýshi elordanyń 32 jastaǵy turǵyny bolyp shyqty.
Polıtsııa qyzmetkerleriniń talabyn oryndamaı, zań tártipke moıynsunbaǵany úshin, kólik júrgizetin qujaty bolmaı, jol tártibin elemeı, qarsy betke shyǵyp júrgeni úshin kúdikti Ákimshilik kodekstiń 4 baby boıynsha (667, 612, 613, 596) jaýapkershilikke tartylǵan. Al onyń júk kóligi aıyp turaǵyna qoıyldy.
