Elorda turǵyny qala ishinde adasyp ketken jabaıy elikti qutqardy

NUR-SULTAN. QazAqparat – Elorda turǵyny jabaıy elikti qutqaryp aldy. Bul týraly Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Facebook paraqshasynda jazdy, dep habarlaıdy QazAqparat tilshisi.

Onyń jazýynsha, Aqmola oblystyq Orman sharýashylyǵy jáne janýarlar álemi aýmaqtyq ınspektsııasyna iKomek 109 qyzmetinen qońyraý kelip túsken.

«Nurlan esimdi elorda turǵyny men onyń áıeli Shanhaı bazary turǵan tasjoldyń boıynda adasyp ketken elikti kórip, ustap alǵan. Qarly boran kezinde elik adasyp, jolǵa shyǵyp ketken. Osydan keıin elik jaqyn mańdaǵy mal bazaryna jetkizilgen. Olar bul týraly 101 jáne 109 qutqarý qyzmetine habarlady», - delingen habarlamada.

Orman sharýashylyǵy jáne janýarlar dúnıesi aýmaqtyq ınspektsııasynyń mamandary dereý atalǵan orynǵa shyǵyp, eliktiń jaǵdaıyn tekserip, ony «Jasyl aımaq» RMK Qyzyljar orman sharýashylyǵyna jibergen.

«Biz Nurlan men onyń jubaıyna, Nur-Sultan qalasynyń qutqarý qyzmetine alǵys aıtamyz. Dostar, eger siz jabaıy janýardy kórseńiz nemese ustasańyz, bizge nemese qutqarý qyzmetterine habarlańyz. Tabıǵatty aıalaıyq!» - dep jazǵan Sáken Dildahmet qala turǵyndaryna úndeý tastady.