Elorda turǵyny garaj qaqpasyn urlap, temir qabyldaý ornyna ótkizip jibergen
NUR-SULTAN. QazAqparat – Elordada turǵyndardyń biri bóten bireýdiń garajynyń qaqpasyn urlap, temir qabyldaıtyn oryndardyń birine ótkizip jibergen. Bul týraly Nur-Sultan qalalyq Polıtsııa departamentiniń baspasóz qyzmeti habarlady.
Baspasóz qyzmetiniń málimetterine qaraǵanda, 33 jastaǵy turǵyn elordanyń Tilendıev kóshesinde ornalasqan garajdardyń biriniń temir qaqpasyn urlap ketken. Onyń urlanǵan múlikti temir qabyldaý ornyna ótkizip jibergeni belgili boldy.
Garaj ıesi qaqpasynyń joǵalǵanyn bilgen soń polıtsııaǵa shaǵymdanǵan.
Jedel-izdestirý sharasynyń barysynda urlyq jasaýy múmkin kúdikti qylmys jasaǵan kúnniń erteńine ustaldy. Ol óziniń istegen áreketin moıyndady. Urlanǵan qaqpa temir qabyldaý ornynan alynyp, ıesine qaıtaryp berildi.
«Kúdiktige qatysty QR QK-niń 188 baby boıynsha (urlyq) sotqa deıingi tergeý jurgizilip jatyr. Kúdiktiniń qala aýmaǵyndaǵy ózge de qylmystarǵa qatystylyǵy tekserilýde»,-delingen Nur-Sultan qalalyq Polıtsııa departamentiniń málimetinde.
