Elorda turǵyny evakýatordyń kómegimen avtokólikti urlap ketken
NUR-SULTAN. QazAqparat – Elorda turǵyny «tapqyrlyq» tanytyp, evakýatordyń kómegimen avtokólikti urlap, ony qosalqy bólshekterge ótkizip jibergen, dep habarlaıdy QazAqparat qalalyq PD baspasóz qyzmetine silteme jasap.
Kólik ıesiniń aıtýynsha, onyń «VAZ 2112» markaly avtokóligi eki aıdan astam ýaqyt boıy synyp turǵan. Tergeý barysynda «Almaty» aýdany polıtsııa basqarmasynyń qyzmetkerleri urynyń keshki ýaqytta evakýatordyń kómegimen kólikti alyp ketkenin anyqtady.
Jedel-izdestirý is-sharalaryn júrgizý kezinde kúdikti ustaldy. 31 jastaǵy urlyqshy uzaq ýaqyt boıy kúzetilmegen turaqtarda turǵan mashınalardy ádeıi izdeıtin bolǵan.
Ol mundaı kólikti turǵyn úılerdiń biriniń aýlasynan tapqan. Kóliktiń kúzet dabyly bolmaǵan, esikteri qulyptalmaǵan jáne jaqyn jerde beınebaqylaý kameralary da kórinbegen. «Tapqyr» qaskúnem evakýator shaqyryp, kólikti avtokólikterdi bólshekteýmen aınalysatyn sheberhanaǵa aparǵan. Sol jerde ózin kólik qojaıynymyn dep tanystyryp, ony satyp jibergen. Atalǵan fakti boıynsha qylmystyq is qozǵaldy.
Nur-Sultan qalasynyń polıtsııa departamenti elorda turǵyndary men qonaqtaryna qyraǵy bolýǵa, kólikti beınebaqylaý kameralarmen jabdyqtalǵan avtoturaqtarǵa qoıýǵa, sondaı-aq esikterin durystap qulyptaýǵa keńes beredi. Oǵan qosa avtokólikterde qundy zattardy qaldyrmaý kerektigin de eskertedi.
