Elorda turǵyny bir saýda úıinen 6 ret urlyq jasaǵan
NUR-SULTAN. QazAqparat – Nur-Sultan qalasynyń tártip saqshylary bir saýda úıinde 6 ret urlyq jasaǵan er adamdy ustady, dep habarlaıdy QazAqparat Polıtsııa departamentiniń baspasóz qyzmetine silteme jasap.
Polıtsııa departamentine saýda úılerdiń birindegi birneshe satýshydan aryz túsken. Tártip saqshylary taýarlar men jeke zattardyń urlyǵyna qatysty jedel izdestirý jumystaryn júrgizip, nátıjesinde 53 jastaǵy elorda turǵynyn ustady.
«Tergeý barysynda anyqtalǵandaı, kúdikti araǵa birneshe kún salyp bir saýda úıinen 6 ret urlyq jasaǵan. Ol saýda úıinde býtıkke klıentter kirgen kezde satýshynyń soǵan qyzmet kórsetip jatqan sátin paıdalanyp, «HUAWEI» markaly telefonyn urlap ketken. Alaıda urlyq faktisi býtıktegi beınebaqylaý kamerasyna túsip qalǵan. Er adam oǵan deıin de urlyq jasaǵan», - delingen habarlamada.
Kúdikti osylaısha uıaly telefon, tósek japqyshty, taǵy basqa taýardy urlap úlgergen. Jartysyn satyp jibergen. Satýshylarǵa 500 myń teńgege jýyq shyǵyn keltirgen.
Atalǵan is boıynsha Qylmystyq kodekstiń 188-babymen qylmystyq is qozǵaldy. Kúdikti qamaýǵa alyndy.
