Elorda turǵyny bir kúnde eki ret sýıtsıd jasamaq boldy
NUR-SULTAN. QazAqparat – Patrýldik polıtsııa ekıpajy sýıtsıd jasamaq bolǵan elordanyń 21 jastaǵy turǵynyn qutqaryp qaldy, dep habarlaıdy QazAqparat tilshisi.
Nur-Sultan qalalyq Polıtsııa departamentiniń málimetinshe, saǵat 14.20-da Jedel basqarý ortalyǵyna Alash tas jolyndaǵy kópirden jas jigittiń sekirýge oqtalyp turǵandyǵy jaıynda habarlama túsken. Oqıǵa kýágerleriniń biri jas jigittiń kópirden sekirýine jol bermegen.
Degenmen, oqıǵa ornyna jiberilgen quramynda Danabek Saǵyndyq pen Nurbol Nurjigitov bar patrýldik polıtsııa ekıpajy sol jerge jetken kezde jas jigittiń qaıtadan kópir jaqtaýyna shyǵyp bara jatqanyn baıqap qalady. Polıtsııa qyzmetkerleri jedel áreket etip, kópir jaqtaýynda turǵan jigitti qaýipsiz jerge shyǵaryp úlgergen.
«Polıtsııa qyzmetkerleri jedel ári úlesimdi áreketteriniń arqasynda jas jigittiń ómirin qutqaryp qaldy. Ómirimen qosh aıtyspaq bolǵan elordanyń 21 jastaǵy turǵyny mán-jaıdy anyqtaý úshin «Baıqońyr« aýdandyq polıtsııa basqarmasyna jetkizildi. Jas jigittiń jan tolǵanysyn turaqtandyrý maqsatynda psıholog áńgimelesti. Kúızelis kezindegi kásibı psıhologııalyq kómek kórsetildi», - delingen departament aqparatynda.
