Elorda turǵyny alıment qaryzyn óteý úshin balalaryna úıin bosatyp berdi
NUR-SULTAN. QazAqparat - Elorda turǵyny alıment bereshegin óteý úshin jer ýchaskesi bar, tolyq salynyp bitpegen úıin óz erkimen balalaryna berdi, dep habarlaıdy QazAqparat tilshisi.
Nur-Sultan qalalyq jeke sot oryndaýshylary óńirlik palatasynyń málimetinshe, úı Aqmola oblysynda ornalasqan. Al azamat E-niń alıment boıynsha bereshegi - 888 270 teńgeni, múlikti bólý boıynsha qaryzy - 3 391 070 teńgeni quraıdy.
Sot oryndaýshysy boryshkerdi múlikti óz erkimen berýge kóndirdi. Ondaı bolmaǵan baǵdaıda úı aýktsıon arqyly satylatyn edi. Biraz oılanǵan boryshker úıin basqa bireýge satqannan góri balalaryma qalsyn degen sheshim shyǵardy.
Óndirip alýshy tólem qabiletsiz bolýyna baılanysty sot oryndaýshysy óz qyzmetin kelisimshart negizinde kórsetti. Áıel múmkindigi bolǵan kezde sot oryndaýshysynyń qyzmetine tólem jasaıdy.
«Azamat E-niń áreketi alıment boıynsha bereshegi bar ózge azamattarǵa da úlgi bolar dep úmit artamyz. Olar ózge bireýlerge emes, óz balalaryna qaryzyn óteıdi. Bul jarqyn úlgi ekendigi sózsiz jáne sot oryndaýshynyń da minsiz jumysy qýantady», - dedi Nur-Sultan qalalyq jeke sot oryndaýshylary óńirlik palatasy basshysynyń orynbasary Madına Janasaeva.
Aıta keterligi, qazirgi ýaqytta elordanyń sot oryndaýshylarynyń óndirisinde alımentke qatysty 14 342 is bar.
Buǵan deıin Nur-Sultan qalasynyń sot oryndaýshylary balalaryna alıment tóleýden jaltaryp júrgen boryshkerdiń Toyota Land Cruiser Prado kóligin alyp qoıǵanyn habarlaǵan edik.
Al Pavlodar oblysynyń jeke sot oryndaýshysy alıment boıynsha qaryzy úshin Ekibastuz qalasy turǵynynyń 4 bólmeli páterin satqan bolatyn.
