Elorda turǵyny Aqsý qalasynda úsh jasar balany qutqaryp qaldy
AQSÝ. QazAqparat -Pavlodar oblysynyń Aqsý qalasynda besinshi qabattyń terezesinde turǵan úsh jasar balany kezdeısoq ótip bara jatqan adam qutqaryp qaldy, dep habarlaıdy QazAqparat pavlodarnews.kz saıtyna silteme jasap.
Aqsý qalasy ákiminiń baspasóz qyzmetinen málim etkendeı, balany qutqarǵan azamat Nur-Sultan qalasynyń 25 jastaǵy turǵyny Dastan Eginbaev. Oqıǵa 30 naýryz kúni bolǵan.
«Kópqabatty turǵyn úıdiń janynan ótip bara jatqan jigit esh oılanbastan dereý balany qutqarýǵa júgire jónelgen. Ol páterdiń esigin buzyp kirgen sátte eki kishkentaı balanyń úıde jalǵyz qalǵandaryn kórgen. Dastan Eginbaev ul balany qorqytyp almaý úshin oǵan aqyryn jaqyndap, terezeden túsirip alǵan», - dedi baspasóz qyzmetinen.
Úsh jáne alty jasar balalardyń ákesi bul ýaqytta jumysta bolǵan, anasy Tórtqudyq aýylyna ketken.
D.Eginbaevtyń sózinshe, onyń izinshe páterge kórshi áıel kelgen. Ol jedel járdem men polıtsııany shaqyrǵan. Oqıǵa ornyna ıývenaldyq polıtsııa ınspektory, Aqsý qalasy kámeletke tolmaǵandardyń isi jónindegi maman, bilim berý bólimi qorǵanshylyq jáne qamqorlyq organynyń mamandary kelgennen keıin balalar Aqsý qalasynyń aýrýhanasyna jetkizilgen.
«Keshe komıssııa otyrysynda bul otbasymen túsindirý jumystary júrgizilip, tıisti shara qoldanyldy. Baqylaýǵa alyndy. Keıbir protsedýralyq sharalardy aıaqtaǵannan keıin balalar úılerine qaıtarylady», - deıdi Kámelettik jasqa tolmaǵandardyń isi jónindegi bólimniń bas mamany Anar Dáýitbaeva.
Aqsý qalasynyń ákimi Balǵabaı Ybyraev Nur-Sultan qalasynda «GKZ» JShS-da saýda menejderi bolyp jumys isteıtin Dastan Eginbaevqa alǵys hat tabys etti.
