Elorda turǵyny: Ákemdi emdegen dárigerler soǵysta júrgendeı ár naýqastyń ómiri úshin kúresti
NUR-SULTAN. QazAqparat - Elorda turǵyny ákesin koronavırýstan emdegen dárigerlerge alǵys aıtty, dep habarlaıdy QazAqparat tilshisi.
«Ózimniń jáne ákem Orazǵalı Abdraımovtyń atynan Nur-Sultan qalasynyń №3 balalar juqpaly aýrýlar aýrýhanasynyń qyzmetkerlerine, atap aıtqanda bólim meńgerýshisi Gúlmıra Nurtazınaǵa, emdegen dáriger Gaýhar Quttybekke, sondaı-aq kishi medıtsınalyq personal Nurbaný Musahmetovaǵa, Merýert Baıkenovaǵa eńbegi úshin alǵys aıtamyn. Ár kún saıyn adam janyn ajaldan arashalap jatyrsyzdar», - dep jazdy Ǵalııa Abdraımova Facebook paraqshasynda.
Onyń aıtýynsha, ákesi koronavırýs dertine shaldyqqan.
«Ákem 11 kún boıy úıde hattama boıynsha emdeldi, biraq densaýlyq jaǵdaıy jaqsarǵan joq. Statsıonarda qalaı emdeıtini týraly jaǵymsyz pikirlerdi oqyǵannan keıin aýrýhanaǵa barýǵa qoryqtyq», - deıdi elorda turǵyny.
Biraq dárigerler taldaý qorytyndysyn qaraǵan soń ákesin aýrýhanaǵa jatqyzýǵa kóndirgen.
«Dárigerler ákeme zamanaýı medıtsınalyq kómek kórsetti. Kún saıyn emdeıtin dárigeri men bólim meńgerýshisi naýqastardyń qal-jaǵdaıyn surap, jaǵdaıyna qaraı em jazyp berip otyrdy. Olar naýqastarǵa rýhanı kómek kórsetti, bul aýyryp jatqan naýqastar úshin óte mańyzdy dúnıe. Dárigerler soǵys alańynda júrgendeı ár naýqastyń ómiri úshin kúresýde. Óz isiniń sheberleriniń emin alǵan ákemniń joly boldy. Sizderge jáne jaqyndaryńyzǵa densaýlyq tilep, aldaryńyzda basymdy ıem», - deıdi ol.
