Elorda turǵyny 2,2 mln teńge alıment qaryzyn tóledi
NUR-SULTAN. QazAqparat – Elordalyq sot oryndaýshylary alıment óndirý jumysyn jalǵastyrýda. Jańa jyl qarsańynda bul baǵyttaǵy jumys kúsheıtildi, dep habarlaıdy QazAqparat Nur-Sultan qalasy Jeke sot oryndaýshylary (JSO) óńirlik palatasynyń baspasóz qyzmetine silteme jasap.
Nur-Sultan qalasynyń turǵyny 2016 jyldyń mamyr aıynan beri alımentke 2,3 mln teńgege jýyq qaryz bolǵan. Osyǵan baılanysty is qozǵaldy.
Boryshkerdiń kámelet jasyna tolmaǵan qyzy bar, ony asyrap-baǵý úshin 2016 jyldan bastap Nur-Sultan qalasy Saryarqa sotynyń sheshimimen alıment tóleýi tıis bolǵan.
Belgisiz sebeptermen boryshker ony tóleýden jaltarǵan.
«Alaıda, osy isti júrgizýmen aınalysqan jeke sot oryndaýshysy 2 mıllıon 250 myń teńge kólemindegi qaryzdy birden óteýge qol jetkizdi» deıdi Nur-Sultan qalasy óńirlik palatasy basshysynyń orynbasary Madına Janasaeva.
Nur-Sultan qalasynyń JSO óńirlik palatasy jańa 2021 jyldy qaryzsyz qarsy alýǵa shaqyrady.
