Elorda turǵyndarynyń úzdik ıdeıalary úshin daýys beretin sońǵy kún ótip jatyr
NUR-SULTAN. QazAqparat - Nur-Sultanda turǵyndardyń úzdik ıdeıalary úshin daýys beretin sońǵy kún ótip jatyr. Elordada Altaı Kólginovtiń tapsyrmasy boıynsha Birge alańy iske qosyldy, dep habarlaıdy qalalyq ákimdiktiń baspasóz qyzmeti.
Bul qala turǵyndarymen birlesip elordany damytýǵa múmkindik beredi. Munda elordalyqtar qyzyǵýshylyq týdyratyn taqyrypta óz ıdeıalaryn usyna alady. Usynystar jınalǵannan keıin onlaın-daýys berý ashylady.
Qazirgi ýaqytta qala turǵyny — D.Nyǵymanovtyń ıdeıasy kósh bastap tur. Ol qoǵamdyq kólikte aqy tóleý, stıpendııany tolyqtyrý, ýnıversıtetke kirý, mekemelerde jeńildikter berý jáne t.b. úshin biryńǵaı stýdenttik karta jasaýdy usynady.
Usynylǵan ıdeıalarǵa sáıkes qala turǵyndary arasynda eń tanymal baǵyttar irikteldi: ýrbanıstıka, qoǵamdyq keńistikter qurý, ekologııa, kólik jáne mádenıet. Qala turǵyndary moderatsııa kezeńderi týraly jıi suraq qoıady. Aıta ketý kerek, ıdeıa túsken kezde bastama tıisti organnyń qaraýyna jiberiledi. Egjeı-tegjeıli zertteýden keıin jeke kabınette ıdeıanyń mártebesi kórsetiledi. Al sarapshylardyń irikteýinen ótken jaǵdaıda usynys onlaın-daýys berý kezeńine jiberiledi.
19.04.2021 j. onlaın-daýys berý nátıjesi boıynsha qala turǵyndarynyń TOP-tanymal ıdeıalary anyqtaldy: biryńǵaı stýdenttik kartany engizý; qoqysty bólek jınaý; ınternet-dúken; Kúıshi Dına atyndaǵy gúlbaq ornatý; balalar arbalarynyń, múmkindigi shekteýli azamattardyń, velosıpedshilerdiń jáne ózgelerdiń kedergisiz ótý múmkindigi úshin jıektastardy jańartý; jaıaý júrginshiler joldaryn jaryqtandyrý; qoldaýdy qajet etetin otbasylar tizimi; kógaldandyrý jáne t.b.
Ideıalardyń bárin sarapshylar qarastyrady, al eń jaqsylary júzege asyrylady.
Ideıa moderatsııanyń úsh kezeńinen ótedi: 1) usynys 2) daýys berý 3) iske asyrý.
Búgingi kúni turǵyndar 280-nen astam bastamany usyndy, olar tıisti organdarmen birlesip egjeı-tegjeıli zerdelendi. Qazirgi ýaqytta onlaın-daýys berý úshin qala turǵyndarynyń 30 kreatıvti ıdeıasy usynyldy. Ár kategorııada ózińiz qoldaıtyn ıdeıany tańdaı alasyz.
Daýystardy qabyldaý 2021 jyldyń 20 sáýirine deıin myna silteme boıynsha ashyq: https://birge-elorda.kz/nur-sultan/. Onlaın-daýys berý qorytyndylary týraly osy jyldyń 20 sáýirinde arnaıy habarlanatyn bolady.
Sondaı-aq, jaqyn arada onlaın-daýys berý úshin qala turǵyndarynyń taǵy 30-ǵa jýyq ıdeıasy usynylatyn bolady.
Esterińizge sala keteıik, elorda «Nur-Sultan — jaıly qala» master-josparynyń tujyrymdamasy aıasynda damyp keledi.
Baılanys: 55 73 61. E-mail: digital@astana kz
