Elorda turǵyndarynyń sany 2030 jylǵa qaraı 2 mıllıonǵa jetedi

ASTANA. QazAqparat – Álemniń jyldam damyp kele jatqan astanalarynyń qataryna kiretin elordamyz basqa qalalardyń damýyna úlgi bolady. Bul týraly Astananyń baýyrlas qalalary forýmynda Prezıdent Qasym-Jomart Toqaev aıtty, dep habarlaıdy QazAqparat tilshisi.

«Ornyqty damý salasyndaǵy BUU maqsattarynyń biri qalany damytýǵa arnalǵan. Bul kezdeısoq emes. Qazaqstanda biz osy baǵytqa erekshe nazar aýdaramyz. Álemniń jyldam damyp kele jatqan astanalarynyń qataryna kiretin elordamyz basqa qalalardyń damýyna úlgi bolady. Ótken shırek ǵasyrda elimizdiń bas qalasynyń aýmaǵy 3 ese ulǵaıyp, halqynyń sany 4 ese ósti», - dedi Qasym-Jomart Toqaev.

Osy oraıda Prezıdent qalanyń ekonomıkalyq áleýetine toqtaldy.

«Sarapshylardyń boljamy boıynsha elorda turǵyndarynyń sany 2030 jylǵa qaraı 2 mıllıonǵa jetedi. El astanasy mártebesine ıe bolǵan sátten beri qalanyń ekonomıkalyq áleýeti 100 eseden astam artty. Qazir qala ekonomıkasy eldegi jalpy ishki ónimniń 10 paıyzdan astamyn quraıdy», - dedi Memleket basshysy.