Elorda turǵyndarynyń neshe paıyzy avtobýspen júredi
ASTANA. QazAqparat – Elordada qoǵamdyq kólikti turǵyndardyń 48 paıyzy paıdalanyp júr. Bul týraly Astana qalasy Kólik jáne jol-kólik ınfraqurylymyn damytý basqarmasy basshysy orynbasarynyń mindetin atqarýshy Baýyrjan Taıbergenov aıtty, dep habarlaıdy QazAqparat tilshisi.
«Qalada qoǵamdyq kólikke suranys óte joǵary jáne munda turǵyndardyń 48 paıyzǵa jýyǵy qoǵamdyq kólikti paıdalanyp keledi. Osy qyzmetti turaqty qamtamasyz etý úshin bizde 99 baǵdar qamtylyp, 1500-den astam júrgizýshi jáne 1100-ge jýyq avtobýs jumyldyrylǵan», - dedi Baýyrjan Taıbergenov Astana qalasy máslıhatynyń turaqty komıssııasynyń otyrysynda.
Sonymen qatar ol jolaýshylardyń zamanaýı talaptaryn eskere otyryp, bul sala belsendi damyp kele jatqanyn aıtty.
«Atap aıtqanda, jyljymaly quram tapshylyǵyna qaramastan, avtobýs baǵdarlary jelisin jańǵyrtý sharalary turaqty túrde atqarylyp jatyr. Bul is-sharalardy júzege asyrý múmkindigi tasymaldaýshylardyń shyǵynyn bıýdjet qarajaty esebinen sýbsıdııalaýǵa tikeleı baılanysty», - dedi B. Taıbergenov.
Jarııalanǵan málimetterge sáıkes, 2022-2023 jyldar aralyǵynda bes jańa baǵyt iske qosyldy - 43, 327, 328, 329, 121. Munymen qosa, 69 baǵdardyń shemasy ońtaılandyrylyp, 62 ýchaskede kólik máseleleri sheshildi. Sondaı-aq 38 baǵyt boıynsha qozǵalys kestesi qaıta qaralyp, qosymsha 62 avtobýs qosyldy.
