Elorda turǵyndaryn san soqtyrǵan alaıaq qolǵa tústi
ASTANA. 29 qazan.t QazAqparat - Astana qalasy Esil aýdanynyń ishki ister basqarmasy tergeý bóliminiń qyzmetkerleri elorda turǵyndarynyń senimine kirip, keıin san soqtyryp júrgen alaıaqty qolǵa túsirdi, dep habarlady Astana qalasy ІІD baspasóz qyzmeti.
Quqyq qorǵaýshylardyń quryǵyna ilikken kúdikti 1972 jyly týǵan, Qostanaı qalasynyń turǵyny ekeni anyqtaldy.
Sál erterekte, naqty aıtsaq, aǵymdaǵy jyldyń tamyz aıynda Semeı qalasynyń turǵyny tártip saqshylaryna shaǵym túsirdi. Aıtýynsha A. esimdi álgi tanys óziniń «Samuryq-Qazyna» ulttyq kompanııasynda jumys isteıtinin aıtyp, odan ári áńgimege tartyp, eger qajetti mólsherde aqshalaı syıaqy berse, jalaqysy joǵary jumysqa turǵyza alatynyn aıtqan. Ol bul qyzmetin qysylmastan 10 myń AQSh dollaryna balapty. Onyń aldaýyna ergen jábirlenýshi jıǵan-tergen bar aqshasyn álgi adamǵa sanap beredi. Tergeý barysynda, alaıaqtyń joǵary laýazymdyq qyzmetke ornalastyratyn múmkindigi bolmaǵany anyqtaldy. Biraq, ol ýádesinde turmaǵan soń aldanǵanyn bilip, polıtsııaǵa aryz túsirgen.
Tergeý barysynda, onyń ózge de qylmystarǵa qatysy bolýy múmkin ekendigi anyqtaldy. Máselen, sol tamyz aıynda ol elordanyń birqatar kásipkerlerine kómek kórsetip, qurylys jumystaryna tapsyrys alyp berýge ýáde bergen. Aqysyna aqshalaı syıaqy talap etip, qarajatty bas merdigerge qysym qoldaný úshin kerek etetinin aıtypty. Arany ashylǵan alaıaqtar munymen toqtalmaǵan, bir alǵanda bar qarajatty bir-aq jasyryp qalýǵa tyrysqan. Qolyna aqsha tıisimen olar birden iz sýytyp otyrǵan. Olardyń zańsyz áreketiniń saldarynan 27 mıllıon teńge shyǵyn kelipti.
Qazir aıypty qamaýǵa alyndy. Oǵan qylmystyq kodekstiń 177 baby 3 tarmaǵy (asa iri kólemdegi alaıaqtyq) boıynsha aıyp taǵylyp otyr. Onyń jemtiktes bolǵan serikterine izdeý jarııalandy. Tergeý jalǵasyp jatyr.
