Elorda turǵyndary: Jyl boıy ótetin aýylsharýashylyq jármeńkesi tıimdi

NUR-SULTAN. QazAqparat - Táýelsizdik kúnine oraı elordada jyl boıy jumys isteıtin aýylsharýashylyq jármeńkesi ashyldy. Ázirge bul jármeńke jyl boıy isteıtin elordadaǵy alǵashqy jáne jalǵyz jármeńke, dep habarlaıdy QazAqparat «Astana» áleýmettik-kásipkerlik korporatsııasy» AQ-nyń baspasóz qyzmetine silteme jasap.

7000 sharshy metrde ornalasqan jańa jármeńkeniń ǵımaratynda 150 kásipker saýda isimen aınalysady. Jármeńke azyq-túlik baǵasyn turaqtandyryp, turǵyndardy jańa jumys oryndarymen qamtıdy.

Saýda júrgizýge elordalyq áleýmettik-kásipkerlik korporatsııasy qoıatyn sanıtarlyq jáne zańdy is júrgizý boıynsha talaptardan bólek – azyq-túliktiń baǵalary naryqtaǵy baǵadan 10-15% arzan bolýy qajet. Buǵan qaramastan kásipkerlerge de jármeńkede jumys jasaý tıimdi bolyp otyr.

«Qazir biz alda kele jatqan demalys kúnderi ótetin jármeńkege aparatyn ónimderdi daıyndap jatyrmyz. Bir apta buryn ótken jármeńkede ákelgen taýarymyzdyń barlyǵyn sattyq, sondyqtan bul joly ónimderdiń kólemin ulǵaıtamyz.

Sonymen qatar, Aqmol saýda úıleri turaqtandyrý qorynyń jeńildetilgen qaryzdary arqyly 10 áleýmettik mańyzy bar azyq-túlik taýarlarynyń baǵasyn turaqtandyryp otyr. Osy jármeńkede Aqmol saýda úıleri arqyly baǵasy turaqtandyrylǵan sút ónimderin jáne Aqmola oblysynyń aýyl sharýashylyqtarynyń ónimderin satyp otyrmyz», - deıdi Aqmol saýda jelileriniń dırektory Oırat Suraǵanov.

«Astana» áleýmettik-kásipkerlik korporatsııasy ókilderiniń aıtýynsha, alǵashqy 3 aı ishinde saýda oryndary tegin beriledi, keıin oryn jaldaý jeńildetilgen tarıf boıynsha alynady. Jármeńkede jergilikti aýyl-sharýashylyqtarynyń ónimderi jáne jaqyn oblystardan azyq-túliktiń barlyq túri jetkiziledi.

«Shynymen de, jármeńkede baǵalar basqa dúkenderge qaraǵanda tómenirek eken. Bir jerden osyndaı baǵalarmen azyq-túlik satyp alýǵa bolatyny – keremet. Jyl boıy jumys jasaıtyn jármeńke ósip kele jatqan qalaǵa óte kerek dep oılaımyn», - deıdi jármeńkeniń tutynýshysy Menzıpa Qadyrǵalıeva.

Jármeńkege qyzyǵýshylyq tanytqan kásipkerler saýda ornyn jalǵa alý úshin 8 7172 61 35 54 nómiri boıynsha habarlasýy qajet.

Esterińizge sala keteıik, jyl boıy jumys isteıtin azyq-túlik jármeńkesi ár demalys jáne meıram kúnderi ótkiziledi. Jumys ýaqyty tańǵy 8:00-den keshki 17:00 deıin dep belgilengen. Jármeńke Nur-Sultan qalasynyń Esil aýdanynda Arnasaı 109 meken-jaıy boıynsha ótkiziledi.