Elorda turǵyndary súriletin úılerine eki ese baǵa talap etýde
NUR-SULTAN. QazAqparat - Búgin elorda ákimi Baqyt Sultanov qalanyń barlyq aýdandaryn aralap, abattandyrý, sý basý, joldardyń jaı-kúıi máselelerimen tanysty, dep habarlaıdy QazAqparat.
Ákimdiktiń resmı saıtynda habarlanǵandaı, qala basshysy Saryarqa aýdanynda Qosshyǵululy, Aqan seri, Shaqpaq, Jalıl, Oqjetpes kóshelerinde, sondaı-aq Agrogorodok shaǵyn aýdanynda boldy.
Baıqońyr aýdanynda Baqyt Sultanov Sýsamyr, Shıeli, Kemeńgeruly, Taıbýryl, Jańajol, Aqjol, Dosmuhameduly, Jetigen, Pýshkın kósheleriniń jáne Óndiris turǵyn alabyndaǵy joldardyń jaǵdaıyn tekserdi.
Baıqońyr aýdanyndaǵy «Kırpıchnyı» kentinde qala ákimi daýly ýchaskelerge qatysty másele kótergen Qarlyǵash Nabıýlınamen kezdesti. Investor bul ýchaske aýmaǵyndaǵy úılerdi súrýdi kózdep otyr. Tıisinshe, turǵyndarǵa Ilınka kentinen baspana usynbaq. Alaıda, keıbir turǵyndar bul usynystan bas tartyp, qarjylaı ótemaqy talap etýde.
Aýdan ákimi Erlan Kanalımovtyń aıtýynsha, ınvestor olardyń úılerin 25-26 mln teńgege baǵalaǵan. Al turǵyndardyń talaby 60 mln teńge kóleminde.
Turǵyndardyń talap-tilegin tyńdaǵan Baqyt Sultanov jaǵdaıdy anyqtap, daýly máseleni sheshýge ýáde berdi.
Odan keıin qala basshysy Almaty aýdanyndaǵy Abylaıhan, Býrabaı, Qozybasy, Lepsi kóshelerinde, sondaı-aq Esil aýdanyndaǵy A.Ermekov, Alpamys batyr, Temirqazyq, Kosmonavttar kósheleri men turǵyn alaptarynda, Prıgorodnyı turǵyn alabyndaǵy Belasar, Arnasaı kóshelerinde boldy.
Sonymen qatar, ol Momyshuly kóshesindegi joldardyń jaı-kúıin tekserdi. «Turǵyndar úshin qolaıly jaǵdaıdy qamtamasyz etý kerek. Tazalyq ornatyp, jaryqtandyrý júrgizý óz aldyna, sondaı-aq kúrmeýi qıyn sýmen jabdyqtaý máselesin jedel túrde sheshý kerek. Aýdan ákimderiniń jumysynda olqylyqtar bar, sondyqtan turǵyndar aıtqan máselelerdi baqylaýǵa alýdy tapsyramyn», - dep qorytyndylady B.Sultanov.
