Elorda turǵyndary Oralǵa jalǵan anyqtamamen kelgen
ORAL. QazAqparat – Elordalyq eki turǵyn Oralǵa jalǵan anyqtamamen kelgen, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, Samara-Shymkent joly boıyndaǵy №2 blokpostta Nur-Sultan qalasynda turatyn A. degen azamat júrgizip kele jatqan «Toıota Kamrı» avtokóligi toqtatylǵan.
Onymen birge kólikte elordalyq taǵy bir turǵyn bolǵan. Qujattardy tekserý kezinde atalǵan azamattar «A» jeke kásipkerliginen alynǵan anyqtamany kórsetken. Onda qyzmet túri karantın kezinde ruqsat etilgen qyzmetter tizimine kiretin «telekommýnıkatsııa» dep jazylǵan. Munyń anyq-qanyǵyna jetý úshin «Qazaqtelekom» AQ-ǵa hat jazyldy.
Odan kelgen jaýaptan belgili bolǵanyndaı, atalǵan jeke kásipkerlik pen «Qazaqtelekom» AQ BQO dırektsııasy arasynda jazbalaı túrde de, aýyzsha da eshqandaı kelisim jasalmaǵan bolyp shyqty.
Atalǵan eki azamatqa qatysty QR Ákimshilik quqyqbuzýshylyq kodeksi 476-babyna sáıkes ákimshilik óndiris qozǵalyp, tıisti shara qabyldaý úshin Nur-Sultan qalasy mamandandyrylǵan ákimshilik sotyna jiberildi.
«Kúni búginge deıin oblysta tótenshe jaǵdaı talabyn buzǵandarǵa qatysty 476-bap boıynsha 601 hattama toltyrylyp, 8 adamǵa eskertý berildi. Sondaı-aq 97 adamǵa ákimshilik aıyppul salynyp, 216-sy qamaqqa alyndy. 280 is qaralý ústinde», dedi QazAqparat tilshisine B.Belgibekov.
Eske sala keteıik, budan buryn BQO-da mal urlaýmen aınalysqan aǵaıyndy barymtashylardyń ustalǵanyn jazǵan bolatynbyz.
