Elorda turǵyndary men qonaqtary karantınnen keıin qaıda baryp sýǵa túse alady
NUR-SULTAN. QazAqparat – Elordada revızııa júrgizgen komıssııa turǵyndary shomylýǵa ruqsat etiletin úsh oryndy belgiledi. Karantın rejımi toqtatylǵannan keıin elorda turǵyndary men qonaqtary belgilengen oryndarda ǵana sýǵa túse alady. Bul týraly Nur-Sultan qalasynyń Tótenshe jaǵdaılar departamentiniń baspasóz qyzmetinen málim etti, dep habarlaıdy QazAqparat tilshisi.
«Búgingi tańda elordada komıssııa tekserýiniń qorytyndysy boıynsha halyqqa arnalǵan 23 shomylý orny belgilendi. Olardyń ázirge úsheýine sýǵa shomylýǵa ruqsat etilgen. Olar: Ortalyq jaǵajaı, «Trı peskarıa» men «Stolıchnyı dvor» demalys orny. Karantın rejımi toqtatylǵannan keıin elorda turǵyndary men qonaqtary kórsetilgen osy oryndarda ǵana sýǵa túse alady. Qalǵan 20 orynda qalalyq máslıhattyń 2017 jylǵy 12 jeltoqsandaǵy sheshiminiń 8-tarmaǵyna sáıkes shomylýǵa tyıym salynady. Búgingi tańda aldyn ala anyqtalǵan qalanyń tórt aýdanynda, atap aıtqanda Almaty-3, Baıqońyr-1, Esil-3, Saryarqa-3-te tegin kommýnaldyq jaǵajaılardy ashý máselesi pysyqtalýda», - dep habarlaıdy vedomstvonyń baspasóz qyzmetinen.
9 mamyrdan bastap qala aýmaǵynda ákimdikpen birge 146 tyıym salý belgisi, 20 aqparattyq stend, 20 qalqymaly sýbelgi ornatylǵan. 14 qaıyq pen súńgýirler toby kezekshilikte júr.
«Osylaısha, Nur-Sultan qalalyq tótenshe jaǵdaılar departamenti men polıtsııa departamentiniń qyzmetkerleri, «Astana jastary», «Qyzyl krest», «Jas Otan» eriktileri 842 adamnyń qatysýymen 271 reıd ótkizgen. Osy jumystardyń arqasynda sýǵa túsý erejelerin buzǵany úshin 80 adam ákimshilik jaýapkershilikke tartylǵan. Qala mektepterinde 3250 oqýshyny qamtyǵan 5 ınteraktıvti sabaq ótkizildi, 5690 únparaq men broshıýra taratyldy», - dep atap ótti baspasóz qyzmetinen.
Nur-Sultan qalasynyń Tótenshe jaǵdaılar departamenti sýǵa túsý ýaqytynda ata-analarǵa balalaryn nazardan tys qaldyrmaý kerektigin eskertedi.
