Elorda turǵyndary men qonaqtary qalanyń kıeli jerlerin aralaýda
«Qazaqstannyń kıeli jerleriniń geografııasy - Elbasy Nursultan Nazarbaevtyń «Rýhanı jańǵyrý» baǵdarlamasy aıasyndaǵy jobalardyń biri. Elordada «Sakraldy geografııa» jobasyna engen ártúrli jerler bar. Bul shara mundaı jerlerdi qala turǵyndary men qonaqtaryna nasıhattaý jáne ishki týrızmdi damytý maqsatynda uıymdastyrylyp otyr», - deıdi Rýhanı jańǵyrý ortalyǵynyń basshysy Aızat Jýasbaeva.
Sharany Nur-Sultan qalasy qoǵamdyq damý basqarmasy men Rýhanı jańǵyrý jobalyq keńsesi birigip uıymdastyrǵan.
«Qyrkúıek aıynda bastalǵan joba jeltoqsannyń ortasynda aıaqtalady. Nıet bildirgen kez kelgen adam ekskýrsııaǵa qatysa alady. Qala turǵyndary elordada ornalasqan kópǵasyrlyq tarıhy bar musylman medresesi, Sáken Seıfýllın murajaıy týraly bile bermeıdi. Ekskýrsııa barysynda olar osyndaı kóne ǵımarattardy aralap, bilimin tereńdetedi», - deıdi ol.
Ortalyq basshysy osy ýaqytqa deıin ekskýrsııaǵa 200-250 adam qatysqanyn aıtty.
«Bul ekskýrsııaǵa mamandar da, oqýshylar da óz erkimen, qyzyǵýshylyq tanytyp kelip jatyr. Ekskýrsııa ár aptanyń sársenbisinde ótedi»,- deıdi Aızat Jýasbaeva.
Ekskýrsııaǵa qatysqan oqýshylar alǵan áserimen bólisti.
«Bul ekskýrsııadan keremet ásermen qaıtyp baramyn. Aqyn, aǵartýshy Sáken Seıfýllın týraly kóp maǵlumat aldyq. Dostaryma «Bir sátke toqtap, osy kúnge jetý úshin qandaı oqıǵalardy bastan ótkizgenimiz týraly oılanaıyq» demekpin», - deıdi №56 mektep-lıtseıiniń oqýshysy Temirlan Nursultanov.
