Elorda turǵyndary medsaqtandyrý boıynsha jeke klınıkalarda em ala alady

NUR-SULTAN. QazAqparat - Búgingi kúni áleýmettik medıtsınalyq saqtandyrý qory elordada 113 medıtsınalyq qyzmet jetkizýshimen shart jasasty, onyń ishinde 76 klınıka – jeke menshik. Saqtandyrylǵan patsıentter osy tizimdegi kez kelgen medıtsınalyq uıymda em alýǵa quqyly, dep habarlaıdy qalalyq ákimdiktiń resmı saıty Qordyń Nur-Sultan qalasy boıynsha fılıalynyń baspasóz qyzmetine silteme jasap.

Áleýmettik medıtsınalyq saqtandyrý qorynda atap ótilgendeı, MÁMS júıesi «aqsha patsıenttiń sońynan eredi» qaǵıdaty boıynsha jumys isteıdi.

Patsıenttiń qandaı da bir tekserýlerden ótý kezinde Qordyń kórsetiletin qyzmetterin berýshiler tizbesinen medıtsınalyq uıymdy tańdaýǵa quqyǵy bar. Ol úshin ýchaskelik dárigerdiń nemese óz emhanasynyń aıasy tar mamanynyń joldamasy bolýy qajet.

Qajetti medıtsınalyq qyzmetti alý úshin qormen kelisimshart jasasqan klınıkalardyń kez kelgenin tańdaýǵa bolady.

Azamattar mamandardyń konsýltatsııalaryn alýǵa, dıagnostıkalyq protsedýralardan ótýge, onyń ishinde jekemenshik medıtsınalyq uıymdarda aqyly negizde emes, medıtsınalyq saqtandyrý aıasynda ýchaskelik dárigerdiń joldamasy boıynsha ótýge múmkindigi bar. Olar alǵan qyzmetter úshin tólemdi Qor júrgizedi.

Sondaı-aq tirkelgen jeri boıynsha emhanada qyzmet kórsetý múmkindigi bolmaǵan jaǵdaıda dáriger osy qyzmetterdi kórsetýge birlesip oryndaý sharty jasalǵan basqa medıtsınalyq uıymǵa joldama berýi tıis. Sol sııaqty patsıent osy qyzmetti kórsetetin qordyń jetkizýshileri arasynan medıtsınalyq uıymdy ózi tańdaı alady. Onda ýchaskelik dárigerdiń joldamasy QR Densaýlyq saqtaý mınıstrliginiń aqparattyq júıelerinde avtomatty túrde birlesip oryndaý shartyn qalyptastyrý úshin negiz bolyp sanalady.
«Búgingi kúni Qor Nur-Sultan qalasy boıynsha 113 medıtsınalyq qyzmet jetkizýshimen shart jasasty, onyń ishinde 76 klınıka – jekemenshik. Jyl saıyn jeke sektordyń úlesi ósýde, naryqta eleýli básekelestik bolýda. Bul – patsıenttiń eń jaqsy klınıkany tańdaý múmkindigi. Medıtsınalyq qyzmetterdi jetkizýshilerdiń tizimi Qordyń saıtynda – fms.kz ornalastyrylǵan», - dedi Áleýmettik medıtsınalyq saqtandyrý Qorynyń elordalyq fılıalynyń basshysy Nurlybek Qabdyqaparov.

Qor saıtynda fms.kz «patsıent úshin» degen bólimde «emhanany tańdaý» degen kishi bólimde TMKKK jáne MÁMS-te medıtsınalyq kómek kórsetýshilerdiń tizbesi myna silteme boıynsha ornalasqan. Tizimderde siz ózińizdiń turatyn aýmaqty, sodan keıin qajetti medıtsınalyq kómek túrin tańdaýyńyz kerek. Sondaı-aq, munda ár ýaqyt saıyn jańartylyp otyratyn EKU, medıtsınalyq ońaltý qyzmetterin jetkizýshilerdiń, birlesip oryndaýshylardyń tizimderi jarııalanady.

Konsýltatsııalyq-dıagnostıkalyq qyzmetterdi jetkizýshilerdiń tizbesi-stomatologııa, rentgenografııa, PTR-testileý, KT jáne MRT myna silteme boıynsha ornalastyrylǵan.

Eger medıtsınalyq kómektiń sapasy men ýaqtylylyǵyna qatysty suraqtaryńyz bolsa, emhananyń patsıentterdi qoldaý jáne ishki aýdıt qyzmetine nemese áleýmettik medıtsınalyq saqtandyrý qoryna ózińizge yńǵaıly baılanys arnasy arqyly habarlasa alasyz: Resmı saıt: fms.kz, baılanys ortalyǵy: 1406, Telegram-daǵy Qoldau 24/7 jáne SaqtandyryBot mobıldi qosymshasy.