Elorda turǵyndary kompıýter jáne ınternet saýattylyqty arttyrýǵa arnalǵan tegin kýrstarǵa qatysa alady (FOTO)
ASTANA. QazAqparat - Búgin Astana qalasynda «Ǵalamtor Siz úshin/ Internet4U» jobasynyń ashylý saltanaty ótti. Atalǵan áleýmettik joba qazaqstandyqtardyń kompıýter, ınternet jáne qarjylyq saýattylyǵyn arttyrýǵa jáne bıznestiń qyr-syryn úıretýge baǵyttalǵan. Uıymdastyrýshylar Astana qalasynda maýsym aıynda jobany synaqtan ótkizip, astanalyqtar úshin jobanyń qanshalyqty qajet ekenin anyqtady.
Qazir Astana qalasynda sabaqtar Internet4U keńsesinde ótkizilip jatyr. Tamyz aıynan bastap Astana qalasynyń birqatar joǵary oqý oryndarynyń bazasynda jobanyń oqý ortalyqtary ashylmaq. Sonymen qatar, jańa oqý jylynan bastap Astana mektepterinde Internet4U arnaıy kompıýterlik synyptarynyń ashylýy josparlanǵan.
Áleýmettik joba Almaty qalasynda 2015 jyldan bastap jumys jasaıdy. Qazir joba aıasy keńeıip, Astana jáne Atyraý qalalarynda júzege asyrylyp jatyr. Jaqyn arada Mańǵystaý oblysynda «Ǵalamtor Siz úshin/ Internet4U» jobasynyń tórtinshi bólimshesi ashylmaq.
«Shevron» kompanııasy BAQ jáne qoǵammen baılanys qyzmetiniń úılestirýshisi
Aınur Sydyqovanyń pikirinshe, energııa qorlanyn óndirý salasynda jumys istep kele jatqan 20 jyldan astam ýaqyt ishinde «Shevron» kompanııasy el azamattarynyń áleýetin arttyrýǵa septigin tıgizip keledi. Ol - elimiz úshin jasalǵan ıgilikti ister qatarynda. «Bul joba adamdardyń jumysqa turýyna jol ashady, halyqtyń ómir súrý sapasyn arttyrady. Kompıýter men ınternetti meńgerý adamdarǵa kóptegen múmkindik beredi. Máselen, qatysýshylar bıznes-ıdeıalaryn júzege asyra alady jáne qosymsha tabys kózine aınaldyra alady», - deıdi Aınur Sydyqova.
Internet4U jobasy halyqtyń kompıýter jáne ınternet (alǵashqy jáne jalǵastyrýshy deńgeı boıynsha), bıznes jáne qarjylyq saýattylyǵyn («Bıznes deńgeı») arttyrý maqsatynda júzege asyrylyp jatyr.
Jastardy trener-volonter retinde jumyldyrý - jobanyń eń mańyzdy artyqshylyǵy. Jobaǵa volonter-trener retinde 100 adam tirkeldi. Volonterlerdiń ortasha jasy - 21. Olardyń basym bóligi - stýdentter.
«Bıznes deńgeıde» vebınarlar men offlaın trenıngter ótkiziledi. Olar jeke kásipti damytý men qarjylyq táýekelderdi azaıtýǵa baǵyttalǵan. Sabaqtardy kásipkerlik salasynda tájirbıesi mol sarapshylar ótkizedi. Osyǵan oraı, Beeline Qazaqstan kompanııasynyń Korporatıvtik qatynas dırektory Alekseı Bendz: «Jetekshi telekommýnıkatsııalyq kompanııa retinde, biz tsıfrlyq teńsizdikti joıýǵa jaǵdaı jasap qana qoımaı, halyqtyń ınternet-saýattylyǵyn arttyrýǵa da umtylamyz. Jastardyń kásipkerligin qoldaý - bizdiń áleýmettik saıasatymyzdyń negizgi baǵytyna jatady. «Ǵalamtor Siz úshin» jobasy aıasyndaǵy jas kásipkerlerge arnalǵan oqý kýrsynyń ashylýy joba úshin mańyzdy qadam. Jobanyń damyp jatqanyna, jańa aımaqtarǵa tarap, qazaqstandyqtarǵa shynaıy kómek berip jatqanyna qýanyshtymyz», - dep pikir bildirdi.
Kýrs tyńdaýshylary jasy da mamandyǵy da alýan túrli adamdar - jumyssyzdardan bastap, tsıfrlendirýge baılanysty qatarynan qalyp qoıǵan dıplomdy tájirıbeli mamandarǵa deıin.
Tyńdaýshylardyń basym bóligi 35-49 jas aralyǵyndaǵy jumyssyz áıelder. Kompıýterlik saýattylyq olarǵa jalaqysy joǵary jumys tabýǵa yqpal etedi. Sonymen qatar, tegin kompıýterlik kýrstarǵa muǵalimder men medıtsına qyzmetkerleri tarapynan suranys joǵary ekendigin baıqaýǵa bolady.
Internet4U jobasyn MediaNet Halyqaralyq jýrnalıstıka ortalyǵy Shevron, «Úıdegi ınternet» brendimen Beeline Qazaqstan kompanııalarynyń qoldaýymen júzege asyrýda. Sonymen qatar, jobaǵa Mańǵystaý jáne Atyraý oblystary ákimdikteri, Astana qalasynyń birqatar joǵary oqý oryndary qoldaý bildirdi.
