Elorda turǵyndary Qazaqstan halqynyń birligi kúnin atap ótti
NUR-SULTAN. QazAqparat - Búgin Qazaqstanda Birlik kúni merekesi atalyp ótti. Birlik pen etnosaralyq kelisimniń jarqyn merekesine oraı Nur-Sultanda túrli is-sharalar uıymdastyryldy, olardyń kópshiligi elorda turǵyndary men qonaqtaryna merekelik kóńil-kúı syılaý úshin ashyq alańdarda ótkizildi, dep habarlaıdy QazAqparta qala ákimdiginiń resmı saıtyna silteme jasap.
Búgin elordanyń tórt alańynda shyǵarmashylyq ujymdar men qala ártisteriniń qatysýymen kontserttik baǵdarlamalar ótti. Kontsertter EKSPO aldyndaǵy alańda, Demalys Promenade jáne Stýdentter saıabaǵynda, sondaı-aq astanalyq ortalyq saıabaqtyń amfıteatrynda uıymdastyryldy.
«Búgin Stýdentter saıabaǵynda Qazaqstan halqynyń birligi kúnine oraı «Naz» memlekettik bı teatrynyń ártisteri bolyp, qonaqtarǵa kontserttik baǵdarlama usynyp, óz shyǵarmashylyǵymyzdy kórsettik. Osyndaı múmkindik jasaǵany úshin qala ákimdigine alǵysymyzdy bildiremiz. Kontsert kópultty halqymyzdyń dostyǵy men birligin qoldaý, Qazaqstanda turatyn barlyq etnostardyń óneri men mádenıetin kórsetý maqsatynda ótkizildi», – dep atap ótti «Naz» memlekettik bı teatrynyń ártisi Sultan Bolatbekuly.
Mereke qonaqtary kontsertke búkil otbasylarymen keldi, tipti ótip bara jatqan jurt ta qosylyp, tamashalady.
«Biz EKSPO-ǵa jaqyn mańaıda turamyz, balalarmyzben birge serýendeý úshin aýlaǵa shyqqanbyz. Biraq qasymyzda kontsert ótip jatqanyn estip, osynda keldik. Búgingi kún raıy da óte qolaıly, Birlik kúnin atap ótýge múmkindik berip tur. Sonymen, syrtqa shyǵyp, qalanyń ózge turǵyndarymen birge ártisterimizdiń shyǵarmashylyǵyn tamashalap, ózge ulttardyń mádenıetimen tanystyq», – dedi elorda turǵyny Roza Bodeeva.
«Uıymdastyrýshylarǵa osyndaı kontsert ótkizgeni úshin alǵysym sheksiz. Jurt merekelik kóńil-kúıde, bári máz-meıram. Kontsert óte keremet ótip jatyr. Ártistermen birge bı bılep, kóńil kóterdik, eresekter úshin de, balalar úshin de qyzyqty boldy. Barsha qazaqstandyqtardy búgingi merekemen quttyqtaımyn! Elimizde aspanymyz árdaıym ashyq, ár otbasynda amandyq bolsyn!» – dep quttyqtady elorda turǵyndaryn astanalyq Alena Karpova.
Sonymen qatar EKSPO mańyndaǵy alańda sporttyq-buqaralyq is-shara uıymdastyryldy. Qala turǵyndary ulttyq sport túrleri boıynsha, naqtyraq aıtqanda asyq atý, armrestlıng, arqan tartý jáne gir kóterý boıynsha jarystarǵa qatysty. Úzdikterge syılyqtar tapsyryldy.
«Barshańyzdy aıtýly mereke – Qazaqstan halqynyń Birligi kúnimen quttyqtaımyn! Osyndaı mereke kúni halyq orkestriniń kontserti uıymdastyrylyp, onyń repertýarynda túrli elderdiń kompozıtsııasy, álemdik mýzykanyń jaýharlary shyrqaldy. Uıymdastyrýshylarǵa kóp-kóp raqmet, tipti kún raıy da merekelik kóńil-kúı syılap tur», – dep atap ótti merekeniń qonaǵy Svetlana Shınkarýk.
