Elorda turǵyndary bos jumys oryndaryn mobıldi qosymsha arqyly bile alady

ASTANA. QazAqparat - Búgin Jumyspen qamtý ortalyǵy elorda turǵyndaryna mekemeniń bazasyndaǵy bos oryndar týraly bilýge múmkindik beretin «CZAstana» mobıldi qosymshasyn iske qosty. Mobıldi qosymsha tegin jáne ony Google Play men App Store dúkenderinen satyp alýǵa bolady, dep habarlaıdy ákimdiktiń resmı saıty.

 Sonymen qatar, qosymshany júktegennen keıin adamdar kásibı baǵdar boıynsha test tapsyra alady. Astana qalasynyń ákimdigi Jumyspen qamtý ortalyǵynyń dırektory Oljas Omardyń aıtýynsha, jumys izdeýshiler áńgimelesýden ótken kezde ózin-ózi ustaný, suraqtarǵa jaýap berý, túıindeme jazý boıynsha aqparatty taba alady. Al jumys berýshiler úshin jumyspen qamtý týraly zańnamanyń normalaryna qatysty paıdaly aqparat usynylady. «Árıne, mundaı aqparatty óz betinshe tabýǵa da bolady, bul jerde biz qolaıly jaǵdaı jasap otyrmyz, sebebi barlyq aqparat bir derekkózge jınalǵan, tek CZAstana qosymshasyn ǵana júktep alý qajet»,- deıdi ol.

Aıta keteıik, elordalyq Jumyspen qamtý ortalyǵy jumys izdeýshiler men jumys berýshilerdiń úlken bazasyna ıe jalǵyz memlekettik organ bolyp tabylady. Ol jumys izdeýshilerge jumysqa ornalasýǵa, al jumys berýshilerge - bilikti mamandardy tabýǵa  septigin tıgizedi. Jumyspen qamtý ortalyǵy jumysqa ornalasý, jastar praktıkasynan ótý, áleýmettik jáne qoǵamdyq jumystarmen qamtamasyz etý, mamandardy daıarlaý jáne qaıta daıarlaý boıynsha qyzmetterdiń keń spektrin usynatyn biregeı alań retinde damyp keledi.