Elorda turǵyndary balkonda án shyrqady
NUR-SULTAN. QazAqparat - Jelide elorda turǵyndarynyń balkonda án shyrqaǵan vıdeolary jarııalandy, dep habarlaıdy QazAqparat.
Alǵashqy vıdeoda qazaqtyń ulttyq kıimin kıgen ánshi halyq áni «Beý-aıdaıdy» oryndaǵan. Keıinirek bul beınejazbany «Highville Park» turǵyn úı kesheninde túsirilgeni anyqtaldy.
Buǵan deıin elorda turǵyny kásibı mýzykant Fedor Selıanın óz balkonynda gıtaramen kontsert bergen edi.
Sondaı-aq, John Legend, «One republic» syndy álemdik juldyzdar #TogetherAtHome uranymen Instagram jelisi arqyly óner kórsetti. Sol sátte olardyń kontsertterin 2,5 mıllıonnan astam adam qaraǵan.
Qazaqstandyq ánshiler de #Birgemiz uranymen Batyrhan Shúkenovtyń ánin oryndady.
Sonymen birge, belgili ánshi, kompozıtor Marat Omarovtyń «Koronavırýs, ket, ket, ket»
atty bastamasyn ózge juldyzdar qoldap áketti.Koronavırýspen kúreste án aıtyp, jigerlenýdi karantınde jatqan Italııa turǵyndary bastaǵan edi. Osylaısha, álemdi álekke salǵan indetke qarsy kúreste moıymaýǵa shaqyrady.
Sońǵy táýlikte Italııada atalmysh dertten 427 adam qaıtys bolǵan. Jalpy bul elde kóz jumǵandar sany 3405-ke jetti. Bul Qytaıda qaza tapqandar sanynan 150 adamǵa kóp. Jalpy alǵanda, Italııada 41 myń adam vırýs juqtyrǵan. Sońǵy 24 saǵat ishinde 5322 adamnan vırýs tabylǵan.
22 naýryz, saǵat 13:30-daǵy jaǵdaı boıynsha, Qazaqstanda koronavırýs ınfektsııasyn juqtyrǵan 57 adam tirkeldi. Nur-Sultan qalasy boıynsha 31 adam, Almaty qalasynda – 23 adam, Qaraǵandy qalasynda - 2, Almaty oblysynda - 1 adam.
Nur-Sultan jáne Almaty qalalary karantınge jabyldy.
