Elorda turǵyndary az qamtylǵan otbasylarǵa kómek berýde

ASTANA. QazAqparat - Áleýmettik jaǵynan az qamtylǵan otbasylarǵa kómek kórsetý maqsatynda «Saryarqa» aýdanynyń ákimdigi «Rahmet - Spasıbo» qaıyrymdylyq dúkenimen birlesip qaıyrymdylyq aktsııasyn júrgizýde, dep habarlaıdy elorda ákimdiginiń medıa ortalyǵy.

Aktsııa aıasynda qalanyń OÁD, «Rahmet» SOO, «Astyqjan» SO sııaqty iri saýda ortalyqtarynda kıimderdi qabyldaıtyn arnaıy bokstar ornatyldy.

Kómekke muqtaj otbasylarǵa demeý bolýdy qalaǵan kez kelgen adam kıimderdi, aıaq kıimderdi, paıdaly da qyzyqty kitaptardy, túrli aksesýarlardy osy bokstarǵa sala alady. Jınalǵan kıimder men zattar belgili bir ýaqyt ishinde qaladaǵy turmysy tómen otbasylarǵa taratylatyn bolady.

«Qoǵamnyń áleýmettik problemalaryna beı-jaı qaramaıtyn barlyq turǵyndardy qaıyrymdylyq aktsııasyna qatysýǵa shaqyramyz», - dep jazylǵan taratylǵan habarlamada.

Atap ótý kerek, jeke tutyný zattaryn, ydys-aıaq pen turmystyq tehnıkany, oıynshyqtardy, azyq-túlik taýarlaryn, dári-dármekterdi bokstarǵa salý tyıym salynady.