Elorda turǵyndary aýla sypyrýshyǵa alǵys aıtty
Elordadaǵy «Keremet» turǵyn úıiniń turǵyndary aýla sypyrýshyǵa alǵys aıtyp, syılyq berdi.
«Osy úıde turǵanyma uzaq jyl boldy. Aýla sypyratyn atanyń jumysyna adaldyǵy úı turǵyndarynyń kóńilinen shyǵady. Baqytkeldi ata aýlany ǵana emes, turǵyn úıden tys joldardyń da qaryn kúrep, jol salyp qoıady. Onyń bul eńbegin jerge qaldyrmaı, kórshilermen birigip, syılyq jasaýǵa sheshim qabyldadyq. Syılyqty týǵan kúnine oraı bereıik dep edik, týǵan kúnine birneshe aı bar eken, sol sebepti osy kúni syılaıyq dep uıǵardyq», - deıdi «Keremet» turǵyn úıiniń turǵyny Artem Aldagarov.
Aýla sypyrýshy Baqytkeldi Keńesov osy úıdiń aýlasyn tazalap júrgenine besinshi jyl bolǵanyn aıtty.
«Jasym 68-de. Úsh nemereniń atasymyn. Ózim de osy úıde turamyn. Astanaǵa kóship kelgenge deıin Jezqazǵandaǵy « Qazaqmysta « jumys istegenmin. Ózim tazalyqty, tııanaqtylyqty jaqsy kóremin, sol sebepti qardy ýaqtyly tazalap, kórshilerime tas jolǵa shyǵatyn joldy ashyp qoıamyn. Qandaı mamandyq, qaı salada júrgeniń - mańyzdy emes. Mańyzdysy - óz jumysyńa adal bolýyń», - deıdi Baqytkeldi ata.
