Elorda turǵyndary aqmolalyq polıtseılerge alǵysyn bildirdi
Elordalyq azamattar jolda oryn alǵan keleńsizdik týraly Aqmola oblystyq polıtsııa departamentiniń áleýmettik jelidegi paraqshasyna jazǵan. Sodan soń ózderine kómek kórsetken polıtseılerge rızashylyqtaryn jetkizgen.
Belgili bolǵandaı, 8 sáýir kúni olar oblys ortalyǵynan elorda baǵytyna jolǵa shyǵady. Biraq jolda kólik dóńgelekteri jarylyp, Toyota estima kóliginiń 31 jastaǵy júrgizýshisine jóndeý jumystary qıynǵa soǵady. Al ary-beri ótip jatqan kólik ıeleri jol jıeginde turǵan bularǵa mán bermegen.
«Nur-Sultan-Petropavl avtojolynyń 275-shaqyrymyndaǵy jol qozǵalysyn baqylaýdy júzege asyrý kezinde jol jıeginde turǵan Toyota estimo kóligin baıqadyq. Kelgen soń nege toqtap turǵandaryn jáne kómek kerek pe dep suradyq», – deıdi polıtseı R.Sábıtov.
«Tulpar-10» ekıpajynyń qyzmetkerleri – PD PPB qyzmetiniń ınspektorlary Ryspek Sábıtov pen Jaqsylyq Katrenov kólik júrgizýshisin Kenesary eldi mekenine deıin ákelip, isten shyqqan dóńgelekterdi jóndedi. Kólikke qaıtyp oralǵan tártip saqshylary júrgizýshige dóńgelekti ornatýǵa kómektesken.
Júrgizýshiniń áıeliniń aıtýynsha, olar jolda shamamen 2,5 saǵat turǵan. Qol ushyn tek polıtsııa qyzmetkerleri sozǵan.
«Aqmola oblystyq jol ınspektsııasy qyzmetkerlerine úlken alǵysymdy bildirgim keledi», – deıdi ol jazbasynda.
