Elorda turǵyndary ákimge turyp jatqan úıleriniń qasbetine qatysty shaǵym túsirdi
NUR-SULTAN. QazAqparat - «Infınıtı 1» men «Infınıtı 2» turǵyn úı kesheniniń turǵyndary elorda ákimi Altaı Kólginovke turyp jatqan úıleriniń qasbetiniń qulaýyna baılanysty shaǵymdandy, dep habarlaıdy QazAqparat tilshisi.
«Qurmetti Altaı Seıdiruly! Sizge Qabanbaı batyr 40 jáne 42 mekenjaıyndaǵy «Infınıtı 1» men «Infınıtı 2» turǵyn úı kesheniniń turǵyndary keshenniń qasbetindegi aıtarlyqtaı aqaýlarǵa baılanysty júginip otyr. Úıimiz 2011 jyly paıdalanýǵa berilgen. Qurylysshysy - «Alıansstroıınvest» JShS. Turǵyn úı keshenine qonystanǵan sátten beri jyl saıyn úı qasbetiniń qulaýyna kýá bolyp otyrmyz. «Alıansstroıınvest» JShS-ine júginýlerimiz esh nátıje bermeı otyr. Osyǵan baılanysty biz 2017 jyly tehnıkalyq zertteý júrgizdik. Nátıjesinde úıdiń qasbetin qalaý tehnologııasynyń buzylýy anyqtaldy», - dep jazdy Facebook-te Sholpan Daqpyrtova.
Onyń aıtýynsha, 2018 jyldyń 19 jeltoqsanynda atalǵan turǵyn úı kesheniniń turǵyndary sotqa «Alıansstroıınvest» kompanııasyna májbúrli túrde úı qasbetin aýystyrý týraly shaǵym túsirgen. Sot barysynda qurylys kompanııasynyń qasbetti qalaý barysynda qatelikterge jol bergeni anyqtalyp, ony qaıtadan salý týraly sheshimi bolǵan. Alaıda áli kúnge deıin qurylys kompanııasy sot sheshimin oryndamaı otyr.
Osy máselege qatysty túsinikteme bergen elorda ákimdiginiń baspasóz qyzmeti «Alıansstroıınvest» kompanııasynyń atalǵan turǵyn úı keshenderine jospardan tys tekserý júrgizilip, nátıjesinde kompanııa ákimshilik jaýapqa tartylǵanyn, materıaldar sot organdaryna jiberilgenin atap ótedi.
«Óz kezeginde jergilikti atqarýshy organdar 2020-2025 jyldarǵa arnalǵan «Nurly jer« turǵyn úı-kommýnaldyq damý memlekettik baǵdarlamasy aıasynda qaıtarylatyn qarajat esebinen úılerdiń qasbetine jóndeý-qaıta qalpyna keltirý jumystaryn júrgizýge járdem bere alatyndyǵyn atap ótken jón», - dedi ákimdikten.
foto: facebook.com/photo.php