Elorda turǵyndary úshin LRT ataýly kartasyn alý tártibi túsindirildi
ASTANA. KAZINFORM – CTS LRT oqýshylar jáne jeńildik sanatyndaǵy kólik kartasyn qalaı rásimdeýge bolatynyn túsindirdi.
— LRT barlyq stansalarynda — karta birden beriledi. Onlaın Transcard.kz saıty arqyly — karta R. Qoshqarbaev dańǵyly, 50/1 mekenjaıyndaǵy Ortalyq kassadan beriledi, — delingen habarlamada.
Kartany rásimdeý quny — 1200 teńge.
LRT ataýly kólik kartalaryn kimder rásimdeı alady:
Elordanyń bilim berý uıymdarynyń 7 jastan 18 jasqa deıingi oqýshylary, Astana qalasynda tirkelgen jáne turaqty turatyn, Astana qalasy máslıhaty bekitken jeńildik sanattaryna jatatyn azamattar.
Jeńildik sanatyna jatatyn azamattar tizimimen CTS saıtynda jarııalanǵan «Jarııa sharttyń» qosymshasynan tanysýǵa bolady.
Ataýly kartany rásimdeý úshin kelesi qujattar qajet:
• týý týraly kýálik/jeke kýálik;
• oqý ornynan anyqtama/jeńildikti rastaıtyn qujat;
• 3×4 foto nemese kassa qyzmetkeri ornynda fotoǵa túsire alady.
Kartany rásimdeýde móri bar qujattardyń túpnusqasyn usyný qajet.
— Jeńildik sanattaryna jatatyn «Qamqorshy», «Zańdy ókil», «Kópbalaly analar» jáne «Kópbalaly otbasy» sanatyndaǵy azamattardyń zeınetaqy kýáliginde jeńildiktiń áreket etý merzimi kórsetilgen, Astana qalasy boıynsha áleýmettik tólemderdi esepteý jónindegi vedomstvoaralyq ortalyqtyń, «Azamattarǵa arnalǵan úkimet» memlekettik korporatsııasy» kommertsııalyq emes aktsıonerlik qoǵamynyń mórimen rastalǵan ózekti jazba bolýy tıis, — delingen habarlamada.
Ataýly kartalardy stansalarda rásimdeý kún saıyn 07:00 — 19:45 aralyǵynda júzege asyrylady. Úzilis — 13:00 — 14:00.
Nazar aýdaryńyz! Qala jáne qala mańy baǵdarlarynda júrýge arnalǵan ataýly kólik kartalary tek Ortalyq kassada beriledi.
Aıta ketelik elordadaǵy LRT nysandarynda qaýipsizdik sharalary kúsheıtilgen edi.
