Elorda turǵyndary kene shaqqan jaǵdaıda medıtsınalyq kómekke qaıda júgine alady
ASTANA. KAZINFORM — Elordada kún jylynyp, keneler kóbeıe bastady. Qalalyq Qoǵamdyq densaýlyq saqtaý basqarmasy kene shaqqan jaǵdaıda turǵyndarǵa dereý medıtsınalyq kómekke júginý qajettigin eskertti, dep habarlaıdy Astana ákimdiginiń resmı saıty.
Kene shaqqan jaǵdaıda qaladaǵy travmatologııalyq pýnkterge shuǵyl túrde qaralý qajet.
Olar myna mekenjaılarda ornalasqan:
Eresekterge arnalǵan travmpýnkter:
• R. Qoshqarbaev dańǵyly, 66 (№ 1 kópsalaly qalalyq aýrýhana);
• Á. Moldaǵulova kóshesi, 26B (№ 3 kópsalaly qalalyq aýrýhana). Balalarǵa arnalǵan travmpýnkt:
• R. Qoshqarbaev dańǵyly, 64 (№ 2 kópsalaly qalalyq balalar aýrýhanasy).
Sonymen qatar, juqpaly aýrýlar statsıonarynyń qabyldaý bóliminen de kómek alýǵa bolady:
• A1 kóshesindegi Qalalyq ınfektsııalyq ortalyq;
• Turar Rysqulov kóshesi, 12 mekenjaıyndaǵy № 3 kópsalaly qalalyq balalar aýrýhanasy.
Mamandar keneni óz betimen alýǵa bolmaıtynyn nyqtap turyp eskertti.
— Eger keneni ózińiz julyp alsańyz, onyń denesi zaqymdanýy múmkin. Basy teri astynda qalyp qoıyp, ınfektsııanyń tez taraýyna sebep bolýy yqtımal, — dedi dárigerler.
Elordalyq dárigerler qarapaıym saqtyq sharalary aýyr zardaptardyń aldyn alyp, ózińizdi jáne balalaryńyzdy qorǵaýǵa kómektesetinin eske saldy.
Tabıǵat aıasyna shyqqanda, ormandy jáne saıabaq aımaqtaryna barǵan kezde mynadaı saqtyq sharalaryn saqtaý qajet:
• jabyq kıim men bas kıim kııý;
• kenege qarsy arnaıy repellentter qoldaný;
• serýennen jáne tabıǵat aıasyndaǵy demalystan keıin ózin-ózi jáne bir-birin tekserý;
• kıim men jeke zattarda keneniń bar-joǵyn muqııat tekserý.
Buǵan deıin Almaty óńirinde kene shaǵý órship turǵany belgili boldy.
