Elorda: Turan dańǵylymen júk kóliginiń qozǵalysyna tyıym salyndy
ASTANA. 10 shilde. QazAqparat - Astanada «Han Shatyr» saýda, oıyn-saýyq ortalyǵyna shyǵatyn jerasty ótpeli jolynyń salynýyna baılanysty Turan dańǵyly boıymen júk kólikterdiń qozǵalysyna tyıym salyndy.
Bul týraly astana kz saıtyna qalalyq Jol polıtsııasynyń baspasóz qyzmetinen málim etti.
«Astana qalasynyń ІІD Jol polıtsııasy kásiporyn basshylary men uıym jetekshileriniń jáne jeke kásipkerlerdiń nazaryna: «Han Shatyr» SOSO-ǵa jerasty ótpeli jolyn salýǵa baılanysty qurylys jumystaryn júrgizýshi mekemelerdiń júk kólikteri úshin Turan dańǵyly boıymen qozǵalysqa shekteý qoıylady»»,- delingen vedomstvo habarlamasynda.
Vedomstvonyń atap ótýinshe, jol polıtseıleriniń uıymdastyrý sharalaryna qaramastan, júk kólikteriniń júrgizýshileri Turan dańǵyly boıymen júrip, keptelis jaǵdaılaryn týǵyzýda.
Shekteý ornynda - K-1 kópirge taıaý Saraıshyq kóshesi men Qorǵaljyn tas jolynda jáne tikeleı Turan dańǵylynda júk mashınalarynyń júrýine tyıym salatyn jol belgileri de qoıylǵan. Sondaı-aq, Saraıshyq, D.Qonaev, Syǵanaq jáne Dostyq kósheleriniń boıyna óndiristik jóndeý jumystary júrgizilip jatqany týraly aqparattyq panno da ornatylǵan.
Qazirgi ýaqytta jol boıyndaǵy qalyptasqan jaǵdaıdy retteý úshin kórsetilgen jol telimderine qosymsha polıtsııa narıadtary qoıyldy.
«Taǵy bir márte eske salamyz, shekteý qoıylǵan jol telimderinde joldy basqa baǵyttarda aınalyp ótý usynylady. Atap aıtqanda: D.Qonaev kóshesi men Dostyq kóshesine ótý úshin «Han Shatyr» SOSO-nyń batys jaǵynan aınalyp ótý kerek. Al júk kólikteriniń qozǵalystary Turan dańǵylynan kópirden Esil ózeni arqyly ońǵa Qorǵaljyn tas jolyna burylyp, Beısekova men Syǵanaq kóshelerine shyǵady. Saraıshyq kóshesiniń boıymen K-1-den B.Momyshuly dańǵylyn qıyp ótip, Qaldaıaqov kóshesine baǵyttalady. Odan Syǵanaq kóshesine shyǵyp, K-3 kópiri arqyly ótedi»,- delingen vedomstvo aqparatynda.
