Elorda túlekteriniń qurmetine «Biz - el bolashaǵymyz» merekelik kontserti ótedi
ASTANA. QazAqparat - 25 mamyr kúni saǵat 13:00-de «Báıterek» monýmenti alańynda «Biz - el bolashaǵymyz» taqyrybynda merekelik kontsert jáne «Sońǵy qońyraýǵa» oraı mektep túlekteriniń bı keshi ótedi. Bul týraly Astana qalalyq bilim basqarmasynyń baspasóz qyzmetinen habarlady.
Aýqymdy sharaǵa elordalyq mektepterden 4593 túlek qatysady. Astana qalasynyń úzdik óner ujymdary óz ónerlerin ortaǵa salyp, án men bıden shashý shashady. Olardyń qatarynda «VIVA» shoý-baleti, «Kazakh Percussion Group» barabanshylar toby, «Z» trıosy bar. Sonymen qatar, bas qalanyń úzdik breıkdans ujymdary jáne M.Ótemisov atyndaǵy Oqýshylar saraıynyń shyǵarmashylyq ujymdary óz sheberlikterin pash etedi.
Shara barysynda túrli baıqaýlar men saıystar da nazardan syrt qalmaıdy. Bilimdi jáne kreatıvti mektep túlekteri úshin ınteraktıvti baıqaýlar uıymdastyrylyp, sharlardy ushyrý, ánnen popýrı ótkiziledi.
