Elordada bokstan Spartakıada ótedi

Astanada 13-19 qarasha aralyǵynda bokstan 4 jylda bir márte ótetin erler arasyndaǵy Spartakıada týrnıri uıymdastyrylady, dep habarlaıdy Kazinform.

QR Boks federatsııasynyń baspasóz qyzmeti taratqan málimetke súıensek, baıraqty doda elorda tórindegi «Beeline Arena» sport kesheninde ótedi.

Atalmysh jekpe-jek saıysynda álem chempıondary Sáken Bıbosynov, Sanjar Táshkenbaı, Mahmud Sabyrhan, Nurbek Oralbaı jáne barlyq óńirden 250-den astam bylǵary qolǵap sheberi synǵa túsedi.

Jekpe-jek olımpıadalyq júıe boıynsha ótedi. Erler 13 salmaq (46-48 keli, 51 keli, 54 keli, 57 keli, 60 keli, 63,5 keli, 67 keli, 71 keli, 75 keli, 80 keli, 86 keli, 92 keli, +92 keli) boıynsha jeńimpazdy anyqtaıdy.

Boks básekesiniń barlyq jekpe-jekterin kúndizgi 15:00-den bastap, «Qazsport» telearnasynda tikeleı efırde kórsetedi. Fınaldyq jekpe-jekterdiń jeńimpazdary 19 qarashada anyqtalady.

Týrnır jeńimpazdary aldaǵy ýaqytta ótetin iri halyqaralyq jarystarda el namysyn qorǵaıdy.

Jankúıerler úshin kirý tegin.

Esterińizge sala keteıik, buǵan deıin Spartakıadany 2019 jyly Qyzylorda qalasy qabyldaǵan bolatyn.

Іs-shara QR Týrızm jáne Sport mınıstrligi, Astana qalasy ákimdigi jáne Qazaqstan boks federatsııasynyń qoldaýymen ótedi.