Elorda tórinde jas sarbazdar áskerı ant qabyldady (FOTO)

Otan úshin otqa túser azamattarymyzdyń ómirindegi jaýapty qadam jasaý sharasyna Ulttyq ulan Bas qolbasshylyǵynyń basshy quramy, atalmysh áskerı bólimniń ardagerleri men jeke quramy, sondaı-aq ant qabyldaýshylardyń ata-ana, týǵan-týystary qatysty.

Ant qabyldaý rásiminde Ulttyq ulannyń qamtamasyz etý polkiniń 80 jaýyngeri Otanǵa adal qyzmet etý jóninde sarbazdyq sert berdi. Jaýyngerler qataryn elimizdiń Shyǵys Qazaqstan jáne Ońtústik Qazaqstan oblystarynan kelgen jastar qurady. Bólimde merzimdi áskerı qyzmet atqarýǵa kóktemde shaqyrtylǵan olar bir aı boıy áskerı ómirdiń tynys-tirshiligine tóselip, jaýyngerlik daıyndyqtan ótti.

Bizdiń halqymyz ejelden Otan úshin tókken terdiń baǵasyn baǵalaı bilgen. Onyń ishinde, qasterli Otan-Anany qorǵaý eń asqaq paryz, abyroıly mindet sanalady. Áskerı ant qabyldaý - Otanyń men halqyńa aqtyq demiń qalǵansha adal bolý, el basyna syn saǵat tússe, ony da moıymaı kóterý, qajet bolsa, jan qııý degen sóz.

Osyndaı sertke sanaly túrde bel sheshken el azamattaryn jaqyndary erekshe yqylaspen qoshemettep jatty. Ár sarbaz ant qabyldaǵan sátten bastap ulan-ǵaıyr jerimizdi bilektiń kúshimen, aq naızanyń ushymen qorǵaǵan jaýjúrek babalarymyzdyń erlik jolyn jalǵastyrýshy, eldiń qorǵanyna aınalary haq.

Jas jaýyngerlerdi, olardyń jaqyndaryn ant qabyldaý rásimimen quttyqtaǵan Ulttyq ulan Bas qolbasshysynyń orynbasary polkovnık Muhametqalı Satov: - Qurmetti jaýyngerler! Bıyl elimiz Jánibek pen Kereı handar negizin qalaǵan Qazaq handyǵynyń 550 jyldyǵyn toılaǵaly otyr. Bul baıtaq jerdi babalarymyz «Aqtaban shubyryndy», «Ańyraqaı shaıqasynda» da aman saqtap, bizge amanattady. Endigi senderdiń maqsattaryń - sol qasterli jerimizdi qorǵap, el tynyshtyǵyn kúzetý. Qadamdaryń oń bolsyn, qyzmetterińe sáttilik tileımin, - dedi.

Áskerı bólim komandıri polkovnık Marat Árinov te sarbazdarǵa degen komandırlik tilegin bildirip, ata-analardy áskerı bólimge ashyq esik kúnine shaqyrdy.

Ulynyń azamat ataný sátine kýá bolý úshin Túrkistan qalasynan arnaıy kelgen Gúldana Táńirbergenova áserimen bylaı bólisti:

- Men Smaıylov Nurtastyń anasymyn. Qarap tursam, balamnyń jaǵdaıy jaqsy eken. Keshe ǵana aýyldan shyǵaryp salǵan bozbala edi. Búgin sapta symdaı tartylyp, eseıip qalypty. Komandırleriniń qamqorlyǵyna rahmet aıtamyn. Otanynyń balasy bop, elge abyroımen oralsyn deımin.

Otan aldyndaǵy boryshtaryn Elordada óteý baqyty buıyrǵan jas sarbazdar endi Astanamyzdyń qoǵamdyq tártibin qas qaqpaı kúzetip, azamattardyń quqyqtarynyń qorǵalýyn qamtamasyz etetin bolady.