Elorda tórinde Sydyq Muhamedjanovtyń tamasha ánderi shyrqalady

Astana qalasy ákimdiginiń memlekettik akademııalyq fılarmonııasynyń uıymdastyrýymen ótkeli turǵan bul kontsert «Shattyq Otany» dep atalady. Sondaı-aq bul Qazaq orkestriniń HH kontserttik maýsymynyń ashylýymen tuspa-tus kelip otyr.

Astana qalasynyń fılarmonııasy el Táýelsizdiginiń 25 jyldyǵy qarsańynda birqatar sharalar ótkizýdi josparlaǵan. Sonyń ishinde óner ujymynyń bastamasy boıynsha tanymal óner ıeleriniń shyǵarmalaryn halyqqa tanytý, nasıhattaý baǵytynda kontsertter bolady.

«Qazaq mýzykasyn, halyq jáne Qazaqstan kompozıtorlarynyń ánderin, shyǵarmalaryn dáriptep turý - bizdiń mindetimiz. Osy oraıda, Qazaqtyń kórnekti kompozıtory Sydyq Muhamedjanovty eske alý keshi uıymdastyrylyp otyr. Onyń buryn oryndalmaı júrgen romanstary men ánderi kórermen nazaryna usynylady. Halyq qulaǵyna kópten beri estilmeı qalyp jatqan shyǵarmalary oryndalady»,- dedi Qazaq halyq aspaptary orkestriniń kórkemdik jetekshisi ári bas dırıjeri, QR eńbek sińirgen qaıratkeri, professor Aıtqalı Jaıymov.

Osy óner keshinde orkestrdiń súıemeldeýimen shyǵarmalar men ánder oryndalady. Orkestrge Aıtqalı Jaıymov dırıjerlik etedi. Endi birqatar týyndylarǵa Mádenıet qaıratkeri Nurlan Bekenov dırıjerilik jasaıdy.

Sydyq Muhamedjanovty eske alý keshi jospar boıynsha júzege asýda. Sondyqtan da bul kontsertke atalǵan óner ujymy jyl basynan beri daıyndyq júrgizdi. Kompozıtordyń shyǵarmalary orkestrge túsirildi. Sebebi kóptegen án romanstarynyń ishinde fortepıanonyń súıemeldeýimen jazylǵandary bar. Odan bólek ánshiler de daıyndaldy.

Aıta ketý kerek, kompozıtor, Qazaqstannyń eńbek sińirgen qaıratkeri, Qazaqstannyń jáne KSRO-nyń halyq ártisi, Qazaqstan Memlekettik syılyǵynyń laýreaty Sydyq Muhamedjanov 1924 jyly dúnıege kelip, 1991 jyly ómirden ozǵan. Artynda óshpes murasy qaldy. Shyǵarmalary elimizdiń altyn qorynda saqtaýly tur.

Kontsert Astana ýaqytymen 19-00-de bastalady.