Elorda termınalyn ulǵaıtý jáne jańǵyrtý 2017 jyldyń naýryz aıynda aıaqtalady - Á. Jaqsybekov

Oǵan qalalyq qurylym ókilderi, qazaqstandyq áýe kompanııalary, UQK, ІІD, Tutynýshylardyń quqyqtaryn qorǵaý departamentiniń ókilderi qatysty, dep habarlaıdy qala ákiminiń baspasóz qyzmeti. Ákim «Nurly jol» ekonomıkalyq saıasatynyń negizgi baǵytynyń biri áýejaıdy damytýǵa kóp kóńil bólingen kólik-logıstıkalyq ınfraqurylymdy damytý ekendigin atap ótti.

Búgingi tańda ishki jáne halyqaralyq áýe qatynastarynyń basym bóligi - Astana men Almaty úlesinde. Elordalyq áýejaı áýe naryǵynda ekinshi orynda, oǵan barlyq reısterdiń 12%, jóneltilgen jolaýshylardyń 24% jáne júk tasymaldaýdyń 6% tıesili.

- Astana áýejaıynyń ótkizý qabilettiliginiń jetkiliksizdigi áýe kompanııalarynyń qyzmetin jáne tutynýshylardyń qajettiligin shekteıdi. Keleshekte bul tutynýshylar trafıgine keri áserin tıgizýi múmkin. Bul máselelerdi sheshý úshin 2015 jyldyń aqpanynda termınaldy ulǵaıtý jáne ushyp-qoný joly men perrondy qaıta jasaý boıynsha jumystar bastaldy jáne 2017 jyldyń naýryz aıynda aıaqtalmaq, - dedi ákim.

Atalmysh jobanyń mańyzdylyǵy týraly aıta kele, qala basshysy Astana áýejaıy - elordanyń ǵana emes, memlekettiń negizgi áýe qaqpasy ekenin de basa aıtty.

Jıyn barysynda ákim jedel sharalar qabyldaýdy qajet etetin uıymdastyrýshylyq jáne tehnıkalyq olqylyqtarǵa toqtalyp ótti.

Qaýipsizdik qyzmetine de syn aıtyldy. Taǵy bir túıtkildi máseleniń biri - zańsyz taksı qyzmeti.

- Elordaǵa keletin jolaýshylarǵa jalpy qabyldaý zalynda kútip, olarǵa óz qyzmetterin usynatyn «jeke tasymaldaýshylar» keri áser etedi. Іshki ister departamentine zańsyz taksı júrgizýshilerge shara qoldanýdy tapsyramyn, - dedi ákim.

Ol sondaı-aq, resmı áýejaı taksıi bolyp tabylatyn «Jebe» taksomotorlyq kompanııasynyń qyzmetkerleri elordalyq deńgeıge saı bolýy úshin úsh tilde erkin sóıleýi kerek ekendigin aıtty.

Ákim qoǵamdyq kólik qyzmetine de toqtaldy. Halyqaralyq áýejaıǵa qatynaıtyn qoǵamdyq kólikter eki avtoparkke qaraıdy (№1, №3).

- Búginde avtobýs kondýktorlaryn ár úsh-tórt aı saıyn aýystyryp otyrý úrdisi qalyptasty. Avtobýstardyń sanıtarlyq jaǵdaıy boıynsha eskertpeler de áli oryndalǵan joq. Kondýktorlardy úıretý kezinde áýejaıǵa qatynaıtyn baǵyttarǵa erekshe kóńil aýdarý qajet. Sonymen qatar, olarǵa aǵylshyn tilin úıretýdi de oılastyrý kerek, - dedi Ádilbek Jaqsybekov.

Jıyn barysynda qyzmet kórsetý sapasyn jaqsartý máseleleri de sóz boldy. Ákimniń aıtýynsha, áýejaıda elordalyq deńgeıge saı kelmeıtin 30 jýyq shaǵyn jáne orta bıznes sýbektisi qyzmet etedi.

- Áýejaı basshylyǵy servısti bir stıldi etý máselesin qarastyrýy kerek. Atap aıtqanda, kıim úlgisin, ydys-aıaq, baǵa kórsetkishterin jáne basqa da elementterdi. Ár kompanııanyń óz «brendin» jarnamalaǵysy keletini túsinikti, biraq, olar qaı jerde qyzmet etip júrgenderin de bilýi kerek. Sebebi, áldebir másele týyndaǵan jaǵdaıda barlyq eskertpeler áýejaı ákimshiligine aıtylady, - dedi elorda basshysy.

Jıyn sońynda Á. Jaqsybekov barlyq jaýapty qurylymdardy atalmysh máselelerdi sheshý jolynda jedel jáne birige áreket etýge shaqyrdy.