Elorda teatrynda tuńǵysh ret Shoqan Ýálıhanovtyń beınesi sahnalanbaq
ASTANA. QazAuparat - Elordalyq Q. Qýanyshbaev atyndaǵy Memlekettik akademııalyq qazaq mýzykalyq drama teatrynyń sahnasynda tuńǵysh ret Shoqan Ýálıhanovtyń beınesi sahnalanbaq. Bul týraly teatrdyń aqparat ortalyǵynan habarlady.
Bıyl ǵalymnyń týǵanyna 180 jyl tolyp otyr. Osy mereıtoıǵa oraı, Q. Qýanyshbaev atyndaǵy Memlekettik akademııalyq qazaq mýzykalyq drama teatry maýsym aıynyń 19-20 aralyǵynda 18.30-da «ShOQAN» dramasynyń premerasyn ótkizedi.
Atalmysh týyndy qazaqtyń áıgili jazýshysy, qoǵam qaıratkeri Sábıt Muqanov pen birqatar dramalyq týyndylardyń avtory Shota Ýálıhanovtyń shyǵarmalarynyń negizinde sahnalanbaq. Qoıýshy rejısseri - Qazaqstannyń eńbek sińirgen qaıratkeri Nurlan Jumanııazov.
Qazaq halqynyń birtýar perzenti, aǵartýshy, ǵalym, saıahatshy Shoqan Ýálıhanovtyń kadet korpýsyndaǵy ómir kórinisteri men ǵumyrynyń sońǵy sátteri qoıylymnyń mazmunyna arqaý bolyp otyr. Basty keıipkerdiń ishki jan dúnıesimen syrlasýy, aınalasyndaǵy jaqyndarynyń, dostarynyń beınelerimen suhbattasýy spektaklde keńinen sýrettelmek.
Qoıylymdaǵy basty keıipker kadet Shoqandy teatrymyzdyń jas akterleri Janat Ospanov pen Baýyrjan Surapbaev sahnalasa, Shoqandy búginde kórermenniń ystyq yqylasyna bólenip, otandyq kıno ónerinde birneshe basty rólderdi somdap júrgen teatr artısteri Qýandyq Qystyqbaev pen Erjan Nurymbetov beıneleıdi.
Sondaı-aq, spektakl barysynan búginde kórermenniń ystyq yqylasyna bólenip júrgen teatr artısteri, Qazaqstannyń Halyq artısi T. Meıramov, Qazaqstannyń eńbek sińirgen qaıratkerleri - B.Ybraev, J.Tólenbaev, L.Beknazar-Hanıngo, A.Nógerbek, N. Óteýilov, QR «Daryn» jastar syılyǵynyń ıegeri S. Qashqabaev óner kórsetedi.
