Elorda teatrlary Naýryz merekesine kórermenderine tartýlar jasamaq
ASTANA. QazAqparat - Frantsýzdyń batyr qyzy Janna d'Ark - qazaq sahnasynda. Búginde elordanyń Qalıbek Qýanyshbaev atyndaǵy memlekettik akademııalyq qazaq mýzykalyq drama teatrynyń ujymy qoıylymnyń sońǵy daıyndyǵyn pysyqtap jatyr. Munda «Jalyn jutqan Janna d'Ark» dramasy alǵash ret sahnalanbaq.
Bul týraly elorda ákimdiginiń resmı saıtynda habarlanǵan. «Qoıylymnyń taqyryby myqty. Onda kip-kishkentaı qyzdyń eline, jerine degen súıispenshiligi beınelengen. Ol jeri úshin, bodandyqta júrgen eli úshin kóterilgen adam. Jalpy, drama bas bostandyǵy, adamnyń ishki bostandyǵy jaıly», - deıdi «Jalyn jutqan Janna d'Ark» dramasynyń qoıýshy rejısseri Álimbek Orazbekov. Otan úshin otqa túsip, frantsýz halqynyń aǵylshyndarǵa qarsy azattyq kúresin basqarǵan batyr qyzdyń rólin somdaý teatr aktrısalary úshin ońaıǵa soqpaǵan. Alaıda, eli úshin ot pen oqqa qasqaıyp qarsy turyp, nebári 19 jasynda ómirden ótken Janna qyzdyń boıynda bar ójettilik pen qaısarlyq, namys pen rýh qazaqtyń arýlaryna da tán qasıet. Osylaısha, Qallekı teatry 12-13 naýryzda tarıhı dramanyń tusaýyn kesip, talǵampaz kórermendi bir serpiltse, bas qalanyń Jastar teatry kishkentaı kórermender úshin tosyn syı ázirlep jatyr. 13-19 naýryz aralyǵynda tusaýy kesiletin «Naýryz arý» ertegisi Ulystyń uly kúni - Naýryz merekesine arnalyp otyr. Ertegide búldirshinderge kún, boran, Naýryz arý syndy keıipkerler arqyly ulttyq dástúrimiz ben Naýryzdyń kelýimen jylqy jylynyń enetini aıshyqty baıandalady. Aıta ketý kerek, bul ertegi 16 naýryz kúni saǵat 11.00-de Astana qalasynyń balalar úıi men turmysy tómen otbasynan shyqqan balalar úshin tegin kórsetiledi.
