Elorda tazalyǵy úshin eń aldymen árbir astanalyq jaýapty bolýy tıis - O. Muhamedjanov
ASTANA. Sáýirdiń 24-i. QazAqparat /Qanat Mámetqazyuly/ - Elorda tazalyǵy úshin eń aldymen árbir astanalyq jaýapty bolýy tıis. Búgin jalpy qalalyq senbilikke qatysqan QR Parlamenti Májilisiniń Tóraǵasy Oral Muhamedjanov osylaı málim etti, dep habarlaıdy QazAqparat tilshisi.
«Jalpy kez kelgen astanalyq azamat qala tazalyǵyna eń birinshi jaýapty bolýy tıis. Sonymen birge, qalany abattandyrýǵa, kógaldandyrýǵa, jurtshylyq demalysy úshin gúl baqtary men saıabaqtardy tazalaýǵa tek senbilikterde ǵana emes, udaıy atsalysqan oryndy dep bilemin. Jalpy qalalyq senbilik ótkizýdegi barshamyzdyń aldymyzda bir ǵana maqsat turatynyn esten shyǵarmaýymyz kerek. Sol úshin de árbir astanalyq jas elordanyń álemniń kórkem de ásem qalalarynyń qatarynan kórinýine óz úlesin qossa ıgi», dedi Májilis Tóraǵasy Oral Muhamedjanov.
Sonymen birge, Tóraǵa 1997 jyly Astanaǵa alǵash kóship kelgennen beri jyl saıyn elordalyq senbilikterge belsendi qatysyp turatynyn aıtyp, bundaı jumystyń bas qalamyz úshin asa qajettiligine toqtalyp ótti. Onyń aıtýynsha, abattandyrý jumysyna ujym-ujym bolyp birlese kiriskende onyń tıimdiligi artyp, aýqymdy sharýa tyndyrylady.
«Jalpy, senbilik qalamyzdyń budan ári taza bolýymen qatar, elordalyqtardy da soǵan úıretedi dep bilemin. Al qalanyń kórkeıýi oǵan degen súıispenshilikti arttyra túsedi», dedi O. Muhamedjanov.
