Elorda sý aıdyndarynda balyqtyń qyrylýyna qarsy is-sharalar júrgizilýde
NUR-SULTAN. QazAqparat -Qalalyq Qorshaǵan ortany qorǵaý jáne tabıǵatty paıdalaný basqarmasy «JasNur» vedomstvolyq baǵynysty kásipornynyń kúshimen alǵash ret sýǵa aeratsııa júrgizý, ıaǵnı Esil ózeni men onyń salalarynda balyqtardyń qyrylýyn boldyrmaý boıynsha aýqymdy is-sharalar júrgizýde, dep habarlaıdy elorda ákimdiginiń resmı saıty.
Balyqtardyń qyrylýyn boldyrmaý jónindegi is-sharalar kásiporynǵa bekitilgen Qoıandy jáne astanalyq sý qoımalarynda da júrgiziledi.
Sý asty tirshiligin qamtamasyz etý úshin jasalatyn negizgi shart – ottegi jiberý. Jaýǵan qar men aıaz sý asty tirshiliginiń basty problemasy bolyp sanalady. Sebebi sý qoımalarynda qatqan muz ben qalyń qar ottegi men jaryqtyń túsýine kedergi bolady. Bul problema balyqtardyń jappaı qyrylýyna ákelýi múmkin.
Osyǵan baılanysty jylda qystygúni sý astynda otteginiń az mólsheri qalǵan kezde Nur-Sultan qalasy ákimdiginiń «JasNur» óndiristik-sharýashylyq kásiporny» MKQK osy iske kirisedi. Bekitilgen sý aıdyndarynda, ıaǵnı Qoıandy-Astana sý qoımasynda jáne Esil ózeni men Aqbulaq arnasynda melıoratsııalyq jumystar júrgizedi. Sonymen, sorǵysh shlang kesilgen shahtaǵa ornatylady jáne motopompa arqyly sý astyna ottegi jiberiledi.
Ary qaraı, mamandar shuńqyrlarǵa qamys ornatady. Qamys sýdyń qatyp qalýyna jol bermeıdi jáne únemi ottegi jiberýin qamtamasyz etedi.
Aıta ketý kerek, bıyl sý aıdyndarynda muzdyń qalyńdyǵy 55 sm-den 1 m-ge deıin jetti.
