Elorda stýdentteri Kosmonavtıka kúnin zııatkerlik týrnırmen atap ótti
ASTANA. 12 sáýir. QazAqparat /Jasulan Amanbaıuly/ - Búgin, 12 sáýir Dúnıejúzilik avıatsııa jáne kosmonavtıka kúnine oraı, Astanadaǵy JOO-nyń stýdentteri «Qazirgi zamanǵy kosmonavtıka máseleleri men bolashaǵy: Qazaqstannan kózqaras» atty breın-rıng zııatkerlik týrnırin ótkizdi.
Oǵan elordadaǵy birqatar oqý oryndarynyń stýdentterinen quralǵan 10-ǵa tarta komanda qatysty.
"Qazirgi tańda Qazaqstan ǵarysh derjavasyna aınalýǵa qulshynys tanyta otyryp, bul baǵytta ǵylymı jáne kommertsııalyq zertteýler jasaýdy bastap ketti. Sonymen qatar ǵarysh salasyndaǵy halyqaralyq áriptestikti ornatýǵa kóp kóńil bólýde. Elimiz úshin osyndaı súbeli merekeniń tusynda Astana qalasynyń Іshki saıasat basqarmasy jáne «Stýdenttik fılarmonııa» qoǵamdyq birlestigi bolashaq ǵalymdar arasynda zııatkerlik jarys ótkizýdi oılastyrdy»,-deıdi uıymdastyrýshylar.
Atalǵan sharanyń maqsaty - stýdentterdiń Qazaqstandaǵy ǵarysh salasynyń damýy týraly bilimderin keńeıtý, stýdentterdiń bos ýaqyttaryn uıymdastyrýdyń zııatkerlik túrlerin yntalandyrý, sondaı-aq Astana qalasyndaǵy JOO arasyndaǵy qarym-qatynas sheńberin ulǵaıtý.
